អាជ្ញាធរអ៊ីរ៉ង់បាននិយាយថា យ៉ាងហោចណាស់មនុស្ស 13 នាក់ត្រូវបានសម្លាប់នៅក្នុងការវាយប្រហារលើទីសក្ការបូជាមូស្លីមនិកាយស៊ីអ៊ីតក្នុងទីក្រុង Shiraz ភាគខាងត្បូងប្រទេសអ៊ីរ៉ង់។ប្រព័ន្ធផ្សព្វផ្សាយរដ្ឋរបស់អ៊ីរ៉ង់បានដកស្រង់សម្តីមន្ត្រីដែលនិយាយថា ភេរវករប្រដាប់អាវុធបានបើកការបាញ់ប្រហារទៅលើមនុស្សនៅខាងក្នុងទីសក្ការបូជា Shah Cheragh កាលពីថ្ងៃពុធ។
នៅពេលរសៀលកន្លែងធម្មយាត្រានេះមានមនុស្សច្រើនកុះករដោយអ្នកគោរពបូជា។ រដ្ឋមន្ត្រីមហាផ្ទៃលោក Ahmad Vahidi បាននិយាយថា ការវាយប្រហារនេះបានបណ្តាលឲ្យមនុស្សយ៉ាងហោច ១៣ នាក់ស្លាប់។
ទីភ្នាក់ងារព័ត៌មានរដ្ឋមួយបានរាយការណ៍ថា យ៉ាងហោចណាស់មនុស្ស 15 នាក់បានស្លាប់ក្នុងនោះមានកុមារ 2 នាក់ និង 19 នាក់ផ្សេងទៀតបានរងរបួស។
ក្រោយមានហេតុការណ៍ខាងលើ ទីសក្ការៈបូជាត្រូវបានបិទ។ប្រធានាធិបតី Ebrahim Raisi បានចេញសេចក្តីថ្លែងការណ៍មួយ និងសម្តែងការរំលែកទុក្ខដល់ក្រុមគ្រួសារជនរងគ្រោះ។លោកបានថ្កោលទោសការវាយប្រហារដោយនិយាយថាអ៊ីរ៉ង់នឹងឆ្លើយតប។ទីភ្នាក់ងារព័ត៌មាន Amaq ដែលមានទំនាក់ទំនងជាមួយក្រុមសកម្មប្រយុទ្ធរដ្ឋអ៊ីស្លាម បាននិយាយថា ក្រុមនេះបានអះអាងទទួលខុសត្រូវចំពោះការវាយប្រហារនេះ។ វាបាននិយាយថាការវាយប្រហារនេះត្រូវបានធ្វើឡើងប្រឆាំងនឹងពួកអ្នកបះបោរឬអ្នកកាន់សាសនាអ៊ិស្លាមនិកាយស៊ីអ៊ីត៕
