មេដឹកនាំចិនបង្ហាញឆន្ទៈធ្វើការជាមួយសហរដ្ឋអាមេរិកដើម្បីផលប្រយោជន៍ទៅវិញទៅមក

ទូរទស្សន៍រដ្ឋចិន CCTV បានរាយការណ៍កាលពីថ្ងៃព្រហស្បតិ៍ថា ប្រធានាធិបតីចិន លោក ស៊ី ជិនពីង បាននិយាយថា ប្រទេសចិនមានឆន្ទៈក្នុងការធ្វើការជាមួយសហរដ្ឋអាមេរិក ដើម្បីស្វែងរកមធ្យោបាយដែលអាចផ្ដល់ផលប្រយោជន៍ដល់ភាគីទាំងសងខាង។

លោក ស៊ី បានថ្លែងសារក្នុងព្រឹត្តិការណ៍មួយរបស់គណៈកម្មាធិការជាតិស្តីពីទំនាក់ទំនងសហរដ្ឋអាមេរិក-ចិនកាលពីថ្ងៃពុធថា ក្នុងនាមជាមហាអំណាចធំៗ ប្រទេសចិននិងសហរដ្ឋអាមេរិកគួរតែពង្រឹងទំនាក់ទំនង និងកិច្ចសហប្រតិបត្តិការដើម្បីជួយផ្តល់ស្ថិរភាពដល់ពិភពលោក។

គួររំលឹកផងដែរថា ប្រទេសទាំងពីរមានជម្លោះលើគោលនយោបាយរបស់ចិនចំពោះតៃវ៉ាន់ ទំនាក់ទំនងរបស់ចិនជាមួយរុស្ស៊ី និងថ្មីៗនេះ កិច្ចខិតខំប្រឹងប្រែងរបស់សហរដ្ឋអាមេរិកក្នុងការរារាំងក្រុមហ៊ុន semiconductor របស់ខ្លួនលក់បច្ចេកវិទ្យាទៅឱ្យក្រុមហ៊ុនចិន។

ថ្មីៗនេះ ប្រទេសចិនបានខឹងសម្បារនឹងដំណើរទស្សនកិច្ចជាច្រើនរបស់សមាជិកសភាអាមេរិកទៅកាន់កោះតៃវ៉ាន់។ ប្រទេសចិនបាននិយាយថា សហរដ្ឋអាមេរិកកំពុងបញ្ជូន “សញ្ញាគ្រោះថ្នាក់” នៅលើកោះស្វយ័ត ដែលចិនអះអាងថាជាទឹកដីរបស់ខ្លួន។លោកស៊ី ដែលទើបតែក្ដាប់អំណាចជាប្រវត្តិសាស្ដ្រជាមេដឹកនាំបក្សកុម្មុយនិស្តក្នុងអាណត្តិទី៣ បានស្តីបន្ទោសការជ្រៀតជ្រែកពីបរទេសលើតៃវ៉ាន់ ហើយថ្មីៗនេះបាននិយាយថា ប្រទេសចិននឹងមិនបោះបង់សិទ្ធិប្រើប្រាស់កម្លាំងឡើយ។
ប្រធានាធិបតីសហរដ្ឋអាមេរិក លោក ចូ បៃឌិន កាលពីថ្ងៃពុធ បាននិយាយថា សហរដ្ឋអាមេរិកមិនបង្កជម្លោះជាមួយប្រទេសចិនទេ៕