ចម្លាក់តោចំនួន២នឹងអាចឈរបង្ហាញសម្រស់ដាក់ភ្ញៀវទេសចរឡើងវិញនៅខាងមុខប្រាសាទអង្គរវត្តក្នុងពេលឆាប់ៗនេះ

អត្ថបទ÷ជួន បូណា និងរូបភាព

MC ចម្លាក់តោចំនួន២ មានទម្ងន់ប្រមាណជាង៣តោន កម្ពស់ជាង២ម៉ែត្រ ដែលយកពីកំពង់ទឹករបស់ស្ពានហាលផ្នែកខាងជើង ផ្លូវចូលប្រាសាទអង្គរវត្តតាំងពីឆ្នាំ ១៩៩៧ យកមករក្សាទុកនៅអភិរក្សដ្ឋានអង្គរ បានធ្វើការជួសជុលពង្រឹងឡើងវិញ បានប្រមាណ៩៥ភាគរយហើយ ដោយក្រុមអភិរក្សថ្មរបស់អាជ្ញាធរជាតិអប្សរា។ក្រោយពីជួសជុលចម្លាក់តោទំាង២នេះរួច ក្រុមអ្នកជំនាញនឹងយកមកដាក់តំាងនៅទីតំាងដើមវិញ នៅពេលឆាប់ៗនេះ ដើម្បីបង្អួតសម្រស់នៅមុខច្រកចូលប្រាសាទអង្គរវត្តឱ្យកាន់តែស្រស់ស្អាត។

ក្រោយពីឃ្លាតចាកឆ្ងាយពីទីតាំងដើមរយៈពេលប្រមាណ ២៥ឆ្នាំកន្លងមក ចម្លាក់តោចំនួន២ ក្រោយពីបញ្ចប់ការងារជួសជុលរួចរាល់ អាជ្ញាធរជាតិអប្សរាត្រៀមយកទៅដាក់នៅទីតាំងដើមឡើង វិញ នៅដើមខែវិច្ឆិកា ឆ្នាំ ២០២២ខាងមុខ ដើម្បីរក្សាបាននូវទម្រង់ដើម លើកតម្លៃ និងបង្កើនសោភ័ណភាពកំពង់ទឹកស្ពានហាលរបស់ប្រាសាទអង្គរឡើងវិញ ក្រោយ ពីទីតាំងស្ពានហាលនេះជិតបញ្ចប់ការជួសជុល។

លោក ឡុង ណារី ប្រធានក្រុមការងារអភិរក្សថ្មនៃនាយកដ្ឋានអភិរក្សប្រាសាទ និងបុរាណវិទ្យា មាន ប្រសាសន៍ថា ក្រុមការងាររបស់លោកចាប់ផ្តើមជួសជុលចម្លាក់ទាំងនេះ កាលពីខែ មេសា ឆ្នាំ២០២២ រហូតដល់ ពេលនេះរយៈពេល៦ខែ។ មកដល់ពេលនេះ ចម្លាក់តោទាំងគូនេះ មានភាពរឹងមាំឡើងវិញហើយ ក្រោយបានបំពេញនូវកន្លែងខូចខាត និងបានបង់ថ្មមួយចំនួនដូចជា ជើងទម្រ ជើង ដងខ្លួន និងផ្នែកផ្សេងៗរបស់តោ ដែលចាំបាច់សម្រាប់ធានាភាពយូរអង្វែងរបស់តោ ជៀសវាងការខូចខាតបន្តទៀត។

លោកឡុង ណារី បានលើក ឡើងថា ចម្លាក់តោថ្មនេះ មុនការជួសជុលមានសភាពទ្រុឌ ទ្រោម បែកបាក់រូបរាងជាអន្លើនៅផ្នែកជើងទម្រ ជើង ទ្រូង និងផ្នែកខាងក្រោយជាដើម។ នៅសម័យបារាំង ចម្លាក់តោនេះ ត្រូវបានជួសជុលដោយប្រើស៊ីម៉ង់ត៍ និងដែកបិទភ្ជាប់ដើម្បីឱ្យមានលំនឹងអាចឈរបានប៉ុណ្ណោះ ប៉ុន្តែក្រោយមក វាក៏បានបែកបាក់ ជាបន្ត បន្ទាប់ទៅតាមអាយុកាលស៊ីម៉ងត៍។

សំឡេង៖ដំបូងឡើយយើងមានព្រួយបារម្ភក្នុងការងារជួសជុលដែរ ព្រោះវាខ្ទេចខ្ទីខ្លាំងពេក មកដល់សព្វថ្ងៃនេះពេលយើងធ្វើបានរូបតោ ឈរបានមាំទាំហើយ យើងមាន ការសប្បាយរីករាយ ហើយសង្ឃឹមថា យើងយកទៅដាក់នៅកន្លែងដើមវិញ ហើយតោបានទៅកន្លែងដើមវិញហាក់មានសេរីភាព យើងដាក់នៅ មុខអង្គរ យើងធ្វើតោហ្នឹងបានទៅដាក់កន្លែងដើមវិញយើងមានសន្តិភាពហើយ អរគុណសន្តិភាព ដែលយើងអាចជួសជុលតោវិញបានទៅដាក់កន្លែងដើម។
លោកឡុង ណារី ប្រធានក្រុមការងារអភិរក្សថ្មនៃនាយកដ្ឋានអភិរក្សប្រាសាទ និងបុរាណវិទ្យា បានបញ្ជាក់ថា ក្នុងការជួសជុល ក្រុមការ ងារក៏បានប្រើបច្ចេកទេសជួសជុលសមស្រប ទៅតាមបទដ្ឋានដែលអាចធានាបាននូវលក្ខណៈដើម និងសុវត្ថិ ភាពយូរអង្វែងនៃចម្លាក់។ រីឯបច្ចេកទេស និងការជួសជុល ក៏ត្រូវបានទទួលស្គាល់ដោយអ្នកជំនាញការអាដហុកផងដែរ៕