លោក ពូទីន៖ “ពិភពលោកប្រឈមមុខនឹងទសវត្សរ៍ដ៏គ្រោះថ្នាក់បំផុតចាប់តាំងពីសង្គ្រាមលោកលើកទី២”

ប្រធានាធិបតីរុស្ស៊ី លោក វ្ល៉ាឌីមៀ ពូទីន បាននិយាយថា ពិភពលោកប្រឈមមុខនឹងទសវត្សរ៍ដ៏គ្រោះថ្នាក់បំផុត ចាប់តាំងពីសង្គ្រាមលោកលើកទី២ នៅពេលដែលក្រុមប្រទេសលោកខាងលិចព្យាយាមទប់ស្កាត់មិនឱ្យមានរង្គោះរង្គើលើអំណាចរបស់សហរដ្ឋអាមេរិកនិងសម្ព័ន្ធមិត្តរបស់ខ្លួនដែលក្ដោបក្ដាប់ពិភពលោក។

លោក ពូទីន កាលពីថ្ងៃព្រហស្បតិ៍ បានចោទប្រកាន់សហរដ្ឋអាមេរិកថាបានញុះញង់ឱ្យមានជម្លោះនៅអ៊ុយក្រែន ដោយបន្ថែមថា លោកខាងលិចកំពុងលេងល្បែងភូមិសាស្ត្រនយោបាយដ៏ “គ្រោះថ្នាក់ បង្ហូរឈាម និងស្មោគរោគ” ដែលកំពុងបង្កភាពវឹកវរនៅទូទាំងពិភពលោក។លោកបាននិយាយថា នៅទីបំផុត លោកខាងលិចនឹងត្រូវចរចាជាមួយរុស្ស៊ី និងមហាអំណាចផ្សេងទៀតអំពីអនាគតនៃពិភពលោក។

លោក ពូទីន បានថ្លែងក្នុងកម្មវិធី Valdai Discussion Club ដែលជាសន្និសីទរបស់អ្នកជំនាញគោលនយោបាយអន្តរជាតិថា៖ “រយៈពេលប្រវត្តិសាស្ត្រនៃការគ្រប់គ្រងរបស់បស្ចិមប្រទេសលើកិច្ចការពិភពលោកកំពុងឈានដល់ទីបញ្ចប់”។លោកបានបន្ដថា៖ “យើងកំពុងឈរនៅព្រំដែនប្រវត្តិសាស្ត្រ។ ខាងមុខប្រហែលជាមានគ្រោះថ្នាក់បំផុត មិនអាចទាយទុកជាមុនបាន ហើយទន្ទឹមនឹងនោះ ទសវត្សរ៍ដ៏សំខាន់ចាប់តាំងពីចុងបញ្ចប់នៃសង្គ្រាមលោកលើកទី ២”។លោកបានបន្ថែមថា រុស្ស៊ីមិនបានចាត់ទុកលោកខាងលិចជាសត្រូវរបស់រុស្ស៊ីទេ បើទោះបីជាដំណាក់កាលនៃការប្រឈមមុខដាក់គ្នានាពេលបច្ចុប្បន្នក៏ដោយ។ ទីក្រុងម៉ូស្គូមានសារតែមួយសម្រាប់ប្រទេសឈានមុខគេនៃលោកខាងលិច និងណាតូ៖ ចូរយើងឈប់ធ្វើជាសត្រូវ ចូររស់នៅជាមួយគ្នា។

សេតវិមានបាននិយាយថា ការកត់សម្គាល់របស់លោក ពូទីន មិនមែនជារឿងថ្មីទេ ហើយមិនបានបង្ហាញពីការផ្លាស់ប្តូរគោលដៅយុទ្ធសាស្ត្ររបស់លោក រួមទាំងនៅអ៊ុយក្រែនផងដែរ៕