អង្គការសង្គ្រោះកុមារ Save the Childrenបានឱ្យដឹងនៅក្នុងរបាយការណ៍មួយរបស់ខ្លួនដែលបានចេញផ្សាយកាលពីថ្ងៃព្រហស្បតិ៍ថាកុមារជាង 150 លាននាក់នៅទូទាំងទ្វីបអាហ្រ្វិកខាងកើត និងខាងត្បូងត្រូវបានរងទុក្ខដោយភាពក្រីក្រ និងគ្រោះមហន្តរាយអាកាសធាតុ។
បើតាមរបាយការណ៍ខាងលើស៊ូដង់ខាងត្បូងជាប់ចំណាត់ថ្នាក់កំពូលក្នុងបញ្ជីប្រទេសនៅអាហ្រ្វិកខាងកើតនិងខាងត្បូងដែលប្រឈមមុខនឹងការគំរាមកំហែងទ្វេរដងដោយមានកុមារចំនួន87% រងផលប៉ះពាល់ បន្ទាប់មកគឺម៉ូសំប៊ិក80%និងម៉ាដាហ្គាស្ការ73%។
Save the Children បានព្រមានថា ប្រសិនបើវិបត្តិអាកាសធាតុ និងវិសមភាពមិនត្រូវបានដោះស្រាយជាបន្ទាន់នោះទេ ភាពញឹកញាប់ និងភាពធ្ងន់ធ្ងរនៃវិបត្តិមនុស្សធម៌ និងតម្លៃនៃការរស់នៅបន្តកើនឡើងខ្ពស់។លោកស្រីYvonne Arunga នាយកគ្រប់គ្រងអង្គការ Save the Childrenប្រចាំនៅប្រទេសកេនយ៉ានិង ម៉ាដាហ្គាស្ការបាននិយាយថា “ភាពអាសន្នផ្នែកអាកាសធាតុ និងវិសមភាពមិនអាចដោះស្រាយដោយប្រទេសណាមួយតែឯងបានទេ ពីព្រោះពួកគេមានទំនាក់ទំនងនឹងគ្នា”។
លោកបាននិយាយថា៖”វិបត្តិទាំងនេះជំរុញឱ្យមនុស្សផុងកាន់តែជ្រៅទៅក្នុងភាពក្រីក្រ ហើយធ្វើឱ្យមនុស្សរាប់លាននាក់កាន់តែងាយរងគ្រោះដោយគ្រោះទឹកជំនន់ឬគ្រោះរាំងស្ងួតនាពេលអនាគត”។
នៅក្នុងប្រទេសកេនយ៉ា កុមារយ៉ាងហោចណាស់16.3 លាននាក់ឬ67% នៃកុមាររបស់ប្រទេសនេះ កំពុងរស់នៅរងទុក្ខដោយសារភាពក្រីក្រនិងគ្រោះអាសន្នអាកាសធាតុ៕
