សម្ដេចតេជោហ៊ុនសែនក្រើនរំលឹកអាជ្ញាធរ និងសមត្ថកិច្ចគ្រប់ជាន់ថ្នាក់យកចិត្តទុក ដាក់ខ្ពស់ ថែរក្សាសន្តិសុខ សណ្តាប់ធ្នាប់ឱ្យបានល្អ ដើម្បីឱ្យប្រជាពលរដ្ឋ និងទេសចរបរទេសមានឱកាសបានសប្បាយរីករាយក្នុងថ្ងៃឈប់សម្រាកក្នុងពិធី បុណ្យអុំទូក នៅទូទាំងប្រទេស

ម៉ឹង កុសល (៣០ ១០ ២២)

សម្ដេចអគ្គមហាសេនាបតីតេជោហ៊ុនសែននាយករដ្ឋមន្ត្រីនៃព្រះរាជាណាចក្រកម្ពុជានៅរសៀលថ្ងៃទី ៣០ ខែតុលាឆ្នាំ ២០២២ នេះ បានឆ្លៀតអញ្ជើញទៅទស្សនាការប្រណាំងទូកនៅទីរួមខេត្តកណ្ដាល ដែល ប្រារព្វធ្វើនៅតាមដងទន្លេបាសាក់មុខសួន ច្បារនៃក្រុងតាខ្មៅ ប្រកបដោយបរិយាកាសអធឹកអធមក្រៃលែង។

សម្ដេចតេជោបានបញ្ជាក់នៅក្នុងសំណេរក្នុងផេក facebook ផ្លូវការរបស់សម្ដេចនារសៀលនេះថា ព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក ឆ្នាំ២០២២ នឹងប្រារព្វនៅថ្ងៃទី៧ .៨ .៩ ខែ វិច្ឆិកា ឆ្នាំ២០២២។

សម្តេចតេជោបញ្ជាក់ថា ឆ្នាំ២០២២នេះ រាជរដ្ឋាភិបាល បានសម្រេចផ្អាកប្រារព្វព្រះ រាជពិធីបុណ្យអុំទូក បណ្តែតប្រទីប សំពះ ព្រះខែ និងអកអំបុក នៅក្នុងរាជធានីភ្នំពេញ ដោយសារកម្ពុជា ត្រូវរៀបចំកិច្ច ប្រជុំកំពូលអាស៊ាន កិច្ចប្រជុំកំពូលពាក់ ព័ន្ធ ទទួលដំណើរទស្សនកិច្ចមេដឹកនាំមកពីបណ្ដាប្រទេសនានាជាច្រើន ក៏ប៉ុន្តែរាជ រដ្ឋាភិបាល បានអនុញ្ញាតឱ្យបណ្ដាខេត្តនានា រៀបចំប្រារពពិធីបុណ្យនេះ នៅតាមខេត្តរៀងៗខ្លួន។

នៅតាមបណ្ដាខេត្តផ្សេងគ្នា គឺមានការ ប្រារព្វថ្ងៃខុសគ្នា ជាក់ស្ដែងសម្រាប់ថ្ងៃ៣០ តុលា នេះ ខេត្តកណ្ដាល បានប្រារព្វពិធីប្រណាំងទូកថ្ងៃទី២ ដែលមានទូកជាច្រើន មកពីតាមបណ្ដាខេត្តក្រុងនានា មកចូលរួមប្រកួត និងមានបងប្អូនប្រជាពលរដ្ឋ ភ្ញៀវជាតិ អន្តរជាតិ ជាច្រើនកុះករ មកលេងកម្សាន្ត សប្បាយរីករាយ ទៅតាមទំនៀម ទម្លាប់របស់ខ្មែរយើង។
ទោះជាយ៉ាងណាក៏ដោយ សម្តេចតេជោ បញ្ជាក់ថា បងប្អូនប្រជាពលរដ្ឋត្រូវតែមាន ការប្រុងប្រយ័ត្នជាប់ជានិច្ច ក៏ដូចជាបង្ការការពារការចម្លងជំងឺកូវីដ១៩ ប្រកាន់ខ្ជាប់ ៣កុំ ៣ការពារ ដោយត្រូវអនុវត្តឱ្យបានខ្ជាប់ខ្ជួននូវការណែនាំរបស់ក្រសួងសុខាភិបាល។

សម្តេចតេជោ បានក្រើនរំលឹកសូមអាជ្ញាធរ និងសមត្ថកិច្ចគ្រប់ជាន់ថ្នាក់យកចិត្តទុកដាក់ខ្ពស់ ក្នុងការថែរក្សាសន្តិសុខ សណ្តាប់ធ្នាប់ឱ្យបានល្អ ដើម្បីឱ្យប្រជាពលរដ្ឋ និងទេសចរបរទេសមាន ឱកាសបានសប្បាយរីករាយក្នុងថ្ងៃឈប់សម្រាកក្នុងពិធីបុណ្យនេះ នៅទូទាំងប្រទេស៕