ដោយ រតនា
ភ្នំពេញ៖ ក្រោយមានករណីគ្រោះថ្នាក់ចរាចរណ៍រវាងរថយន្តនិងរថយន្ត និងមានការសង្ស័យ សមត្ថកិច្ចដាក់កម្លាំងឆែករថយន្តដែលមានផ្លាកលេខខេមរភូមិន្ទដែលបានបង្កគ្រោះថ្នាក់ចរាចរណ៍ បុករះទៅលើរថយន្ត២គ្រឿង រកឃើញមានកេសឡាំង មានបិតស្កុតជុំវិញ ចំនួន០៦កេស សង្ស័យជាសារធាតុញៀន ត្រូវបានដកហូតយកទៅរក្សាទុកនៅអធិការដ្ឋាននគរបាលខណ្ឌច្បារអំពៅ ជាបណ្តោះអាសន្ន ដើម្បីធ្វើការស្រាវជ្រាវជាបន្ត។


ករណីនេះផងដែរលោកវរៈសេនីយ៍ទោ ឡូ ភារម្យ អធិការរងទទួលផែនប្រឆាំងគ្រឿងញៀននៃអធិការដ្ឋាននគរបាលខណ្ឌច្បារអំពៅបានឲ្យដឹងថាក្រោយមានករណីគ្រោះថ្នាក់ចរាចរណ៍រវាងរថយន្តមួយគ្រឿងដែលពាក់ស្លាកលេខខេមរៈភូមិន្ទបានបុកជាមួយនឹងរថយន្តពីរគ្រឿងទៀតកម្លាំងជំនាញបានចុះទៅដល់ទីតាំងកើតហេតុ ពិនិត្យឃើញថាមានសារភាពញៀនពេលនោះកម្លាំងមូលដ្ឋានបានទំនាក់ទំនងជាមួយនឹងការិយាល័យជំនាញ បានចុះមកត្រួតពិនិត្យ និងដកហូតបានសារធាតុញៀនចំនួន២០០គីឡូក្រាម។ ចំណែកម្ចាស់រថយន្តរងគ្រោះទាំង២គ្រឿង បានយករថយន្តទៅជួសជុលដោយខ្លួនឯង ព្រោះមិនចង់វែងឆ្ងាយ។


គួរបញ្ជាក់ផងដែកាលពីវេលាម៉ោង១១និង៣០នាទីយប់ ថ្ងៃទី១៣ ខែវិច្ឆិកា ឆ្នាំ២០២២ មានករណីគ្រោះថ្នាក់ចរាចរណ៍មួយបានកើតឡើង ដោយរថយន្តបង្កម៉ាក IZUSU Hi-Lander ពណ៌ទ្រេអ៉ី ពាក់ផ្លាកលេខខេមរភូមិន្ទ02 2-1415 បើកបរដោយបុរសម្នាក់ រួមដំណើរដោយបុរសម្នាក់ទៀត បានបើកបរក្នុងល្បឿនលឿន ទៅបុករថយន្តពីរគ្រឿងរងការខូចខាត ស្ថិតនៅតាមបណ្តោយផ្លូវជាតិលេខ១ ទល់មុខសំណង់លំនៅដ្ឋានវាលស្បូវ ក្នុងសង្កាត់វាលស្បូវ ខណ្ឌច្បារអំពៅ រាជធានីភ្នំពេញ។


