ប្រភពមួយបានបញ្ជាក់ប្រាប់កាសែតរ៉យទ័រថា សហភាពអឺរ៉ុបទំនងជានឹងប្រកាសផែនការនៅក្នុងកិច្ចប្រជុំកំពូល COP27 នៅថ្ងៃអង្គារ ដើម្បីធ្វើបច្ចុប្បន្នភាពគោលដៅកាត់បន្ថយការបំភាយឧស្ម័នក្រោមកិច្ចព្រមព្រៀងទីក្រុងប៉ារីស មុនពេលកិច្ចប្រជុំកំពូលរបស់អង្គការសហប្រជាជាតិនៅឆ្នាំក្រោយ។
ចំណាត់ការរបស់សហភាពអឺរ៉ុប ដែលជាប្លុកបញ្ចេញផ្សែងពុលច្រើនជាងគេបំផុតលើពិភពលោកលំដាប់ទី៣ បន្ទាប់ពីចិន និងសហរដ្ឋអាមេរិក អាចទំនងជាព្យាយាមបញ្ចុះបញ្ចូលប្រទេសផ្សេងទៀតថាសហភាពអឺរ៉ុបដែលមាន២៧ ប្រទេសកំពុងប្រកាន់ខ្ជាប់ដោយការប្តេជ្ញាចិត្តរបស់ខ្លួនក្នុងការប្រយុទ្ធប្រឆាំងនឹងការប្រែប្រួលអាកាសធាតុ ទោះបីខ្លួនកំពុងប្រឈមមុខនឹងវិបត្តិថាមពលក៏ដោយ។
ការលុកលុយរបស់ប្រធានាធិបតីរុស្ស៊ី លោក វ្ល៉ាឌីមៀ ពូទីន ទៅលើអ៊ុយក្រែន បានបង្កឱ្យមានវិបត្តិប្រេងសាំងនៅអឺរ៉ុប និងបានជំរុញឱ្យប្រទេសមួយចំនួនដុតធ្យូងបន្ថែមទៀត ខណៈដែលពួកគេកំពុងប្រជែងគ្នាដើម្បីជំនួសការផ្គត់ផ្គង់ថាមពលពីប្រទេសរុស្ស៊ី ដែលត្រូវបានជាប់ទណ្ឌកម្មនៅឆ្នាំនេះ។
អ្នកបង្កើតគោលនយោបាយរបស់សហភាពអឺរ៉ុប និយាយថា សកម្មភាពនេះគឺបណ្តោះអាសន្ន ហើយចង្អុលទៅផែនការពង្រីកថាមពលកកើតឡើងវិញ ដែលគណៈកម្មការអឺរ៉ុបបានស្នើឱ្យមានមហិច្ឆតាបន្ថែមទៀតនៅឆ្នាំនេះ ដើម្បីជួយប្រទេសនានាឱ្យឈប់ប្រើប្រាស់ឧស្ម័នរុស្ស៊ី។
ប៉ុន្តែប្រទេសនៅតំបន់អឺរ៉ុបបានដុតធ្យូងថ្មកាន់តែច្រើន ខណៈពេលដែលប្រទេសក្រីក្រត្រូវបានគេទទូចឱ្យផ្ដាច់ខ្លួនចេញពីការប្រើប្រាស់ប្រេងឥន្ធនៈ ដែលបានធ្វើឱ្យមានភាពស្មុគស្មាញដល់កំណត់ត្រាអាកាសធាតុរបស់សហភាពអឺរ៉ុប។ ទន្ទឹមនេះ មេដឹកនាំប្រទេសមួយចំនួននៅឯកិច្ចប្រជុំកំពូល COP27 ក៏បានត្អូញត្អែរពីការដើរថយក្រោយលើគោលដៅបៃតងផងដែរ៕
