បើកលឿន មិនគិតចាប់ហ្វ្រាំងមិនទាន់ ជ្រុលចង្កូតបុក រង្វង់មូល ព្រហ្មមុខបួន

ដោយ រតនា

ភ្នំពេញ៖ បុរសម្នាក់បានបើកបររថយន្ត ហាយឡេនដឺ ចុះពីលើស្ពានជ្រោយចង្វារ ក្នុងល្បឿនលឿន រហូតជ្រុលចង្កូតបុកឡើងខឿនរង្វង់មូលកងព្រហ្មជ្រោយចង្វារ បណ្តាលឲ្យរងការខូចខាតរថយន្ត ព្រមទាំងហេដ្ឋារចនាសម្ព័ននៅលើសួនច្បារជាច្រើន។

ហេតុការណ៍នេះ បានកើតឡើងកាលពីវេលាម៉ោង២និង៣០នាទី រំលងអធ្រាត្រ ឈានចូលថ្ងៃទី១៦ ខែវិច្ឆិកា ឆ្នាំ២០២២ ចំណុចរង្វង់មូលកងព្រហ្ម ស្ថិតក្នុងសង្កាត់ ជ្រោយចង្វារ ខណ្ឌជ្រោយចង្វារ រាជធានីភ្នំពេញ។

តាមប្រភពព័ត៌មានពីកន្លែងកើតហេតុបានឲ្យដឹងថាមុនពេលកើតហេតុគេបានឃើញរថយន្ត HIGHLANDER ពណ៌ទឹកប្រាក់មួយគ្រឿង ពាក់ស្លាកលេខ ស្វាយរៀង 2B-9299 បើកបរដោយបុរសម្នាក់ ធ្វើដំណើរចុះពីលើស្ពានជ្រោយចង្វារ ទិសដៅពីលិចទៅកើត ក្នុងល្បឿនលឿនដូចហោះ។ ខណៈមកដល់ចំណុចកើតហេតុ ក៏បានជ្រុលចង្កូតបុកឡើងខឿនសួនច្បារនៃរង្វង់មូលកងព្រហ្ម ( ព្រហ្មមុខបួន ) បណ្តាលឲ្យខូចខាតហេដ្ឋារចនាសម្ព័ននៅលើសួនច្បារ បូករួមទាំងអំពូលភ្លើងបំភ្លឺសួនមួយដើមតូចផងដែរ។

ចំណែករថយន្តត្រូវបានរងការខូចខាត នៅផ្នែកខាងមុខយ៉ាងខ្លាំង ផ្ទុះពោងការពារសុវត្ថិភាពចំនួន២ រួមទាំងបែកកង់ចំនួន៣ផងដែរ តែម្ចាស់រថយន្តមិនមានរងរបួសនោះទេ។

ក្រោយពេលកើតហេតុ សមត្ថកិច្ចមូលដ្ឋានបានចុះមកដល់ទីតាំងកើតហេតុ រួចបានទាក់ទងទៅកាន់សមត្ថកិច្ចជំនាញ ដើម្បីចុះមកធ្វើការវាស់វែង និងយករថយន្តបង្ក ទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដើម្បីរង់ចាំម្ចាស់រថយន្តចូលខ្លួនទៅដោះស្រាយ តាមនីតិវិធី៕