មហាសេដ្ឋីរ៉ែអូស្ត្រាលី លោក Andrew Forrest បានចាប់ផ្តើមមូលនិធិមួយ ដែលត្រូវបានគេរំពឹងថាមានតម្លៃយ៉ាងហោចណាស់២៥ពាន់លានដុល្លារ ដើម្បីជួយកសាងអ៊ុយក្រែនឡើងវិញ ដែលបាននិងកំពុងហែកហួរដោយសង្រ្គាម។លោក Forrest និងភរិយាបានប្តេជ្ញាផ្ដល់មូលនិធិចំនួន៥០០លានដុល្លារដល់ ដែលអ្នករៀបចំកម្មវិធីនិយាយថាអាចកើនឡើងដល់១០០ពាន់លានដុល្លារ។
“គំនិតផ្តួចផ្តើមកំណើនបៃតងអ៊ុយក្រែន” គ្រោងនឹងវិនិយោគលើហេដ្ឋារចនាសម្ព័ន្ធបឋម ដូចជាបណ្តាញថាមពល និងទូរគមនាគមន៍។ លោកប្រធានាធិបតី Zelensky បានស្វាគមន៍ចំពោះមូលនិធិនេះ។លោក Zelensky បាននិយាយថា៖ “យើងនឹងទាញយកអត្ថប្រយោជន៍ពីអ្វីដែលរុស្ស៊ីបានបំផ្លាញ ហើយអ្វីទាំងអស់នោះអាចត្រូវបានជំនួសដោយហេដ្ឋារចនាសម្ព័ន្ធបៃតង និងឌីជីថលទំនើបបំផុត”។
ម្ចាស់មូលនិធិនេះបាននិយាយថា លោកបានធ្វើការជាមួយលោក Larry Fink ដែលជាប្រធានក្រុមហ៊ុនវិនិយោគយក្ស BlackRock ហើយសង្ឃឹមថានឹងទទួលបានការគាំទ្រពីមូលនិធិទ្រព្យផ្សេងៗទៀត។ចាប់តាំងពីចាប់ផ្តើមការងារលើមូលនិធិនេះនៅដើមខែមីនា លោក Forrest បាននិយាយថា លោកបានពិភាក្សាអំពីផែនការនេះជាមួយមេដឹកនាំពិភពលោកមួយចំនួន រួមទាំងប្រធានាធិបតីសហរដ្ឋអាមេរិក លោក Joe Biden នាយករដ្ឋមន្ត្រីអង់គ្លេស លោក Boris Johnson និងប្រធានគណៈកម្មការអឺរ៉ុប លោកស្រី Ursula von der Leyen ។
លោក Forrest បានប្រាប់កាសែត BBC ថា៖ “ប្រធានាធិបតីអ៊ុយក្រែនមើលឃើញថា វាជាឱកាសមួយដើម្បីជំនួសទាំងស្រុងនូវស្ថានីយ៍ថាមពលនុយក្លេអ៊ែរនិងធ្យូងថ្មចាស់ជាមួយនឹងថាមពលបៃតងថ្មី”។លោកបានបន្ថែមថា៖ “មូលនិធិអាចចាប់ផ្ដើមការងារក្នុងរដ្ឋធានីភ្លាមៗ នៅពេលដែលកងកម្លាំងរុស្ស៊ីត្រូវបានដកចេញ ពីទឹកដីកំណើតរបស់អ៊ុយក្រែន”៕
