រដ្ឋធានីហ្សាការតា៖ គ្រោះរញ្ជួយដី មានកម្លាំង៥,៦រ៉ិចទ័រ បានវាយប្រហារទៅលើកោះជ្វាខាងលិច នៃប្រទេសឥណ្ឌូណេស៊ី បានសម្លាប់មនុស្ស ជាង១៦០នាក់ និង រាប់រយនាក់ផ្សេងទៀត រងរបួស ហើយមនុស្ស ជាង ១៣ ០០០នាក់ បានខូចខាត និង បាត់បង់ផ្ទះសម្បែង។
សារព័ត៌មាន The News បានចេញផ្សាយ កាលពីថ្ងៃចន្ទ ទី២១ ខែវិច្ឆិកា ថា ក្រុមមន្រ្ដីឥណ្ឌូណេស៊ី បានបញ្ជាក់ ថា គ្រោះរញ្ជួយដីមានកម្លាំងខ្លាំង កាលពីថ្ងៃចន្ទ បានវាយប្រហារទៅលើកោះជ្វាខាងលិច ដោយបានសម្លាប់មនុស្ស អស់១៦២នាក់ និង រាប់រយនាក់ផ្សេងទៀត រងរបួស ខណៈក្រុមអ្នកជួយសង្គ្រោះ កំពុងតែស្វែងរកអ្នកនៅរស់រានមានជីវិត នៅក្នុងគំនរបាក់បែក។ រីឯចំណុចកណ្ដាល នៃការរញ្ជួយដីកម្រិត៥,៦រ៉ិចទ័រនេះ ស្ថិតនៅជិតទីក្រុងសៀនជូ (Cianjur) នៃកោះជ្វាខាងលិច ដែលសម្បូរទៅដោយភ្នំ ដែលមានចម្ងាយ៧៥គីឡូម៉ែត្រ នាភាគនិរតី រដ្ឋធានីហ្សាការតា ជាទីដែលមានមនុស្សជាង២,៥លាននាក់រស់នៅ។
លោក រីដវ៉ាន់ កាមីល (Ridwan Kamil) អភិបាលកោះជ្វាខាងលិច (West Java) បានបញ្ជាក់ ថា ចំនួនអ្នកបាត់បង់ជីវិត ភាគច្រើនជាសិស្សសាលា ខណៈបានបញ្ចប់ការសិក្សាតាមម៉ោងរបស់រដ្ឋកំណត់ ហើយទៅបន្ដការសិក្សា នៅតាមសាលាអ៊ិស្លាមនានា ជាទីដែលត្រូវអគាររំលំសង្កត់ ដោយសារគ្រោះរញ្ជួយដី។ រីឯចំនួនអ្នកស្លាប់ បានកើនឡើងច្រើន ខណៈមនុស្ស ជាង ១៣ ០០០នាក់ បានខូចខាតផ្ទះសម្បែង។
ប្រទេស មានប្រជាជនជាង២៧០លាននាក់ ស្ថិតក្នុងតំបន់អាស៊ានមួយនេះ តែងតែជួបប្រទះនឹងគ្រោះរញ្ជួយដី ក៏ដូចជា បន្ទុះភ្នំភ្លើង ជាញឹកញាប់ ដោយសារឥណ្ឌូណេស៊ី ស្ថិតនៅតំបន់ខ្សែក្រវាត់ភ្នំភ្លើង នៃមហាសមុទ្រប៉ាស៊ីហ្វិក៕
