ភ្នំពេញ=បុរសម្នាក់បានស្លាប់នៅក្រោមដំណក់ទឹកភ្លៀង បន្ទាប់ពីបានបើកម៉ូតូទៅបុក រថយន្តកុងតឺន័រ ពីក្រោយ ហេតុការណ៏នេះកើតឡើងនៅវេលាម៉ោង៣និង៣០នាទីយប់រំលងអធ្រាត្រឈានចូលថ្ងៃពុធ ទី២៣ ខែវិច្ឆិកាឆ្នាំ២០២២ត្រង់ចំណុចជិតបុរីអូរឌឹម តាមបណ្តោយផ្លូវជាតិលេខ៤ ក្នុងសង្កាត់ចោមចៅទី៣ ខណ្ឌពោធិ៏សែនជ័យ រាជធានីភ្នំពេញ។
បើតាមប្រភពនៅកន្លែងកើតហេតុបានអោយដឹងថា ដំបូងឡើយគេឃើញបុរសម្នាក់ បើរថយន្ដកុងតឺន័រមួយគ្រឿងមិនចាំស្លាកលេខ ធ្វើដំណើរតាមបណ្ដោយផ្លូវជាតិលេខ៤ ក្នុងទឹសដៅពីកើតមកលិច លុះមកដល់ចំណុចកើតហេតុ ក៏មានបុរសម្នាក់បើកម៉ូតូហុងដាឌ្រីម C125មួយគ្រឿង ពណ៌ខ្មៅពាក់ស្លាកលេខភ្នំពេញ 1AP-9726 ធ្វើដំណើមកពីក្រោយមកបុក ពេញទំហឹង បណ្ដាលឲ្យបុរសជាអ្នកបើកបរ ហោះផ្លោងទៅបុករថយន្ដកុងទឺន័រ ដួលនឹងថ្នល់ស្លាប់ភ្លាមៗនៅនឹងកន្លែងកើតហេតុ។
ភ្លាមៗសពជនរងគ្រោះមិនត្រូវបានសមត្ថកិច្ចស្គាល់អត្តសញ្ញាណនោះទេ។ ដោយមាន ភិនភាគជាបុរសម្នាក់ វ័យខ្ទង់៤០ឆ្នាំ ស្លៀកខោកាប៊យជើងវែង ពាក់អាវឆ្នោតសរលាយខៀវដៃខ្លី។
ក្រោយពីកើតហេតុសមត្ថកិច្ចនគរបាលជំនាញ ខណ្ឌមកដល់ទីតាំងកន្លែងកើតហេតុយកម៉ូតូទៅរក្សាទុក។ ឯសពជនរងគ្រោះបន្ទាប់ពីធ្វើកំណត់ហេតុរួចបានដឹកយកទៅ តម្កល់ទុកនៅវត្តទឹកថ្លារង់ចាំសាច់ញាតិ មកទទួលយកទៅធ្វើបុណ្យតាមប្រពៃណី។
