ទាហានអ៊ុយក្រែន៥០នាក់ ត្រូវបានដោះលែង ក្នុងការដោះដូរអ្នកទោស ជាមួយរុស្ស៊ី

ប្រធានការិយាល័យប្រធានាធិបតីអ៊ុយក្រែន លោក Andriy Yermak បាននិយាយកាលពីថ្ងៃព្រហស្បតិ៍ថាបន្ទាប់ពីការផ្លាស់ប្តូរអ្នកទោសចុងក្រោយជាមួយរុស្ស៊ី ទាហានអ៊ុយក្រែន50នាក់បានត្រឡប់មកមាតុប្រទេសវិញ។

លោកYermakបានសរសេរនៅលើបណ្ដាញទំនាក់ទំនងTelegramថាក្នុងចំណោមអ្នកដែលត្រូវបានគេដោះលែងនោះ មានមន្ត្រីពីរនាក់និងទាហាន៤៨នាក់។

លោកបានបន្ថែមថា ភាគច្រើននៃទាហានដែលត្រូវបានដោះលែងនោះបម្រើការនៅក្នុងកងនាវាចរអ៊ុយក្រែន ឆ្មាំជាតិ និងកងកម្លាំងប្រដាប់អាវុធ។

លោកYermakមិនបានផ្តល់ព័ត៌មានលម្អិតអំពីចំនួនទាហានរុស្ស៊ីដែលត្រូវបានដោះលែងដោយអ៊ុយក្រែនក្រោមកិច្ចព្រមព្រៀងនោះទេ។

មន្ត្រីរូបនេះបាននិយាយថា កិច្ចខិតខំប្រឹងប្រែងដើម្បីដោះលែងទាហានអ៊ុយក្រែនបន្ថែមទៀតពីការឃុំឃាំងរបស់រុស្ស៊ីកំពុងដំណើរការ។សូមរំលឹកថាអ៊ុយក្រែន និងរុស្ស៊ីបានធ្វើការផ្លាស់ប្តូរអ្នកទោសលើកដំបូងរបស់ពួកគេនៅក្នុងខែមីនា៕