គ្រូបង្វឹកកូរ៉េខាងត្បូងលោក Paulo Bento បាននិយាយថាហ្គាណាជាក្រុមមានប្រព័ន្ធលេងការពាររឹងមាំ ហើយប្រយុទ្ធខាងលើក៏ល្អថែមទៀត។
កូរ៉េខាងត្បូង នឹងត្រូវប្រកួតជាមួយក្រុមហ្គាណាក្នងជំនួបទី២នាពានរង្វាន់ FIFA World Cup 2022 នៅរាត្រីនេះ។ក្រុមអាស៊ីមួយនេះ បានបើកឆាកប្រកួតដំបូងនោះបានត្រឹមស្មើជាមួយក្រុមអ៊ុយរុយហ្គាយ ០-០ ប៉ុណ្ណោះមិនមានគ្រាប់បាល់កើតឡើងនោះទេ។ តែនៅការប្រកួតទី២នេះ គ្រូបង្វឹកកូរ៉េខាងត្បូងសង្ឃឹមថានឹងមានគ្រាប់បាល់កើតឡើង ហើយក៏អាចយក៣ពិន្ទុដ៏សំខាន់ពីហ្គាណាផងដែរ។
លោកPaulo Bento បាននិយាយថា៖ “ខ្ញុំជឿជាក់ថារឿងសំខាន់បំផុតក្នុងការប្រកួតគឺជឿជាក់លើសមត្ថភាពខ្លួនឯង។ យើងមានសមត្ថភាពគ្រប់គ្រាន់ក្នុងការប្រកួត យើងត្រូវតែហ៊ានបង្ហាញនៅលើទីលាន។ ហ្គាណាជាក្រុមខ្លាំងមួយ។ ពួកគេមានប្រព័ន្ធការពាររឹងមាំហើយប្រយុទ្ធខ្លាំង។ យើងដឹងថាវាជាការប្រកួតលំបាក យើងត្រូវការលេងសហការគ្នាដូចកាលប្រកួតទី១ដែរ។ ខ្ញុំជឿជាក់ថាយើងនឹងឈ្នះប្រកួតនេះ”៕
