ក្រុមគ្រូពេទ្យប៉ាឡេស្ទីន និងប្រភពក្នុងស្រុកបាននិយាយថា ក្រុមសកម្មប្រយុទ្ធប៉ាឡេស្ទីនពីរនាក់ត្រូវបានសម្លាប់កាលពីថ្ងៃព្រហស្បតិ៍ក្នុងអំឡុងពេលប៉ះទង្គិចគ្នាជាមួយទាហានអ៊ីស្រាអែលនៅក្នុងជំរុំជនភៀសខ្លួន Jenin នៅភាគខាងជើងតំបន់West Bank។
ក្រុមគ្រូពេទ្យនៅទីក្រុងJeninបាននិយាយថាឧបទ្ទវហេតុនេះបានកើតឡើងនៅក្នុងសង្កាត់Al-Hadaf ក្នុងជំរុំជនភៀសខ្លួន។
កងកម្លាំងប្រដាប់អាវុធរបស់អ៊ីស្រាអែល ដែលគាំទ្រដោយរថពាសដែក បានសម្រុកចូលជំរុំជនភៀសខ្លួនខាងលើ ហើយបានកំណត់គោលដៅផ្ទះមួយដែលមានកាំជ្រួចប្រឆាំងរថក្រោះ។ ប្រភពក្នុងស្រុក និងសាក្សីបាននិយាយថា មានការប៉ះទង្គិចគ្នាយ៉ាងខ្លាំងក្លារវាងទាហាននិងក្រុមសកម្មប្រយុទ្ធប៉ាឡេស្ទីន។
យោងតាមប្រភពព័ត៌មានបានឲ្យដឹងថា ម្នាក់ក្នុងចំណោមអ្នកស្លាប់គឺជាសមាជិកនៃក្រុមជីហាតអ៊ីស្លាមប៉ាឡេស្ទីនហើយម្នាក់ទៀតជាសមាជិករបស់ក្រុមAl-Aqsa Martyrs Brigades។ប្រភពដដែលបាននិយាយថាកម្លាំងប្រដាប់អាវុធអ៊ីស្រាអែលបានដកខ្លួនចេញពីជំរំជនភៀសខ្លួនបន្ទាប់ពីចាប់ខ្លួនជនជាតិប៉ាឡេស្ទីនបួននាក់។
សូមជ្រាបថាភាពតានតឹងនៅតំបន់ West Bank បាននិងកំពុងកើនឡើងចាប់តាំងពីខែមីនា តួលេខផ្លូវការពីភាគីទាំងពីរបានបង្ហាញថា ចាប់តាំងពីខែមករាមកជនជាតិប៉ាឡេស្ទីនជាង200នាក់ និងជនជាតិអ៊ីស្រាអែលជាង20នាក់ ត្រូវបានសម្លាប់នៅក្នុងការវាយប្រហារជាបន្តបន្ទាប់៕
