ម៉ឹង កុសល (០២ ១២ ២០២២)
វេទិកាអភិបាលក្រុងអាស៊ាន AMF និង កិច្ចប្រជុំអភិបាលរាជធានី និង រដ្ឋធានីអាស៊ាន MGMAC ឆ្នាំ២០២២ជាយន្តការដែលអនុញ្ញាតឱ្យរដ្ឋបាលមូលដ្ឋានរបស់អាស៊ាន អាចបង្កើនទំនាក់ទំនង ជំរុញកិច្ចសហប្រតិបត្តិការឱ្យកាន់តែទូលំទូលាយ តាមរយៈការចែករំលែកចំណេះដឹងនិងបទពិសោធន៍។
ថ្លែងក្នុងពិធីបើកវេទិកាអភិបាលក្រុងអាស៊ាន និង កិច្ចប្រជុំអភិបាល រាជធានី និង រដ្ឋធានីអាស៊ាន ឆ្នាំ២០២២ នៅថ្ងៃទី០២ ខែធ្នូ ឆ្នាំ២០២២ នាសណ្ឋាគាររ៉ស៊ីដង់ សុខាភ្នំពេញ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍ថា សម្តេចពិតជាមានសេចក្តីសោមនស្ស ដោយបានចូលរួមជាអធិបតី ក្នុងពិធីបើកវេទិកា អភិបាលក្រុងអាស៊ាន (AMF) ក្រោមប្រធានបទ «ការពង្រឹងកិច្ចសហការអាស៊ាន តាមរយៈការជំរុញការកសាងទីក្រុងឆ្លាត មានភាពធន់ និង មានចីរភាព ប្រកបដោយបរិវត្តកម្ម និង បរិយាបន្ន តាមគន្លងប្រក្រតីភាពថ្មី» និង កិច្ចប្រជុំអភិបាលរាជធានី និង រដ្ឋធានីអាស៊ាន (MGMAC) ក្រោមប្រធានបទ «ការជំរុញកិច្ចសហប្រតិបត្តិការគ្រប់ជ្រុងជ្រោយ ដើម្បីទីក្រុងឆ្លាត មានភាពធន់ និងមានចីរភាព» ដែលត្រូវបានអាក់ខានអស់រយៈពេល ២ ឆ្នាំកន្លងមកហើយ ដោយសារការឆ្លងរាលដាល នៃជំងឺកូវីដ-១៩ ។
សម្តេចតេជោ សូមកោតសរសើរ និងវាយតម្លៃខ្ពស់ ចំពោះការកំណត់ប្រធានបទ ដ៏ត្រឹមត្រូវបំផុត ស្របតាមស្ថានការណ៍តំបន់ និងសកល នាពេលបច្ចុប្បន្ននិងទៅអនាគត ។ សម្តេចតេជោបានបញ្ជាក់ថា ទីក្រុង គឺជាបេះដូងនៃប្រទេស និងតំបន់នីមួយៗ ដោយជាកន្លែងប្រមូលផ្ដុំសកម្មភាពគ្រប់ទិដ្ឋភាព ទាំងផ្នែកសង្គម សេដ្ឋកិច្ច វប្បធម៌ និងនយោបាយ ។ ដូច្នះការអភិវឌ្ឍសង្គម-សេដ្ឋកិច្ច និង ការកសាងសហគមន៍មួយដ៏រឹងមាំ ប្រកបដោយចីរភាព និង បរិយាបន្ន ត្រូវផ្ដើមចេញពីការកសាង និង តភ្ជាប់ទីក្រុងឆ្លាត មានភាពធន់ និង មានថីរភាព ៕
