ដោយ រតនា
ភ្នំពេញ៖ បញ្ហាសណ្ដាប់ធ្នាប់នៅតែជាបញ្ហាប្រឈមរបស់អាជ្ញាធរថ្នាក់មូលដ្ឋានដែល ពលរដ្ឋមួយចំនួនតូច មិនចូលរួមសហការជាមួយអាជ្ញាធរ ខណៈដែលពលរដ្ឋមួយចំនួនធំបានចូលរួមសហការយ៉ាងល្អជាមួយអាជ្ញាធរពេលចុះរៀបចំសណ្ដាប់ធ្នាប់ដើម្បីរក្សា អនាម័យបរិស្ថានសណ្ដាប់ធ្នាប់ និងរំដោះចិញ្ចើមផ្លូវ កាត់បន្ថយការកកស្ទះចរាចរណ៍នៅក្នុងមូលដ្ឋានផងដែរ។
ក្រោយមានការចុះរៀបចំ ជាប្រចាំរបស់អាជ្ញាធរខណ្ឌដូនពេញ បញ្ហាសណ្ដាប់ធ្នាប់ អនាម័យបរិស្ថាន តាមដងផ្លូវក្នុងមូលដ្ឋានខណ្ឌ សង្កេតឃើញថា មានភាពល្អប្រសើរ។
គួរបញ្ជាក់ផងដែរ នៅព្រឹកថ្ងៃទី19 ខែធ្នូ ឆ្នាំ២០២៣នេះ ដោយអនុវត្តន៍តាមបទបញ្ជា លោក ជា ខេមា អភិបាល ខណ្ឌដូនពេញ បានចាត់ឲ្យ លោក ចាប ឌីណា អភិបាល រងខណ្ឌដូនពេញ បន្តដឹកនាំមន្ត្រីក្រោមឱវាទចុះរៀបចំសណ្តាប់ធ្នាប់ អនាម័យបរិស្ថាន នៅតាមបណ្តយផ្លូវ១១០ ពីមហាវិថីព្រះនរោត្តម ដល់មហាវិថីព្រះសុី សុវត្ថិ ផ្លូវលេខ១៩ ផ្លូវលេខ១៥ ផ្លូវ ០៣ និងផ្លូវលេ ខ៥ ក្នុងភូមិសាស្រ្តខណ្ឌដញនពេញ ដែលពលរដ្ឋក៏ដូចជាអ្នកប្រកបអាជីវកម្មរំលោភយកចិញ្ចើមផ្លូវលើសពី ១ភាគ៣ ដើម្បីរក្សាទុកចិញ្ចើមផ្លូវសម្រាប់អ្នកថ្មើជើងឬពិការភាពធ្វើដំណើរផងដែរ។
ក្នុងនោះដែរ លោក ចាប ឌីណា បានបញ្ជាក់ថា ការរៀបចំ គឺអនុវត្តជាប្រចាំ ព្រោះមូលដ្ឋានខណ្ឌដូនពេញ ជាតំបន់ទេសចរណ៍សេដ្ឋកិច្ចនយោបាយ វប្បធម៌ ដែលមានភ្ញៀវជាតិ អន្តរជាតិ មកកម្សាន្ត ស្របពេលដែលប្រទេសជាតិមានសុខសន្តភាព ប្រជាពលរដ្ឋអាចអញ្ជេីញដំណេីរកម្សាន្តគ្រប់ទីកន្លែងដែលខណ្ឌដូនពេញ មានរមណីយដ្ឋាន ប្រវត្តិសាស្ត្រ វត្តភ្នំ ព្រះបរមរាជវាំង សារមន្ទីរជាតិ ។ល។ ដូច្នេះ សន្តិសុខ សណ្តាប់ធ្នាប់ អនាម័យ បរិស្ថាន ត្រូវតែស្អាត មានអនាម័យ បរិស្ថានល្អ ជាទីគាប់ចិត្តរបស់មហាជន។ ក្នុងនាមអាជ្ញាធរលោក ចាប ឌីណា បានស្នេីសុំបងប្អូនអាជីវករ ប្រជាពលរដ្ឋមេត្តាជួយសហការដេីម្បីសោភ័ណភាព មូលដ្ឋានយេីងទាំងអស់គ្នា។ បន្ថែមទៀតលោក សូមថ្លែងអំណរគុណដល់ ប្រជាពលរដ្ឋគ្រប់លំដាប់ថ្នាក់ដែលបានហការជាមួយអាជ្ញាធរ ក្នុងការរៀបចំសណ្តាប់ធ្នាប់ របៀបរៀបរយក្នុងមូលដ្ឋាន៕
