ម៉ឹងកុសល ( ២៩ ១២ ២២ )
កម្លាំងនាយកដ្ឋាន នៃអាជ្ញាធរជាតិប្រយុទ្ធប្រឆាំងគ្រឿងញៀន សហការជាមួយកម្លាំងសមត្ថកិច្ចពាក់ព័ន្ធនៅខេត្តស្ទឹងត្រែងចុះបំពេញបេសកកម្ម បង្កើនការទប់ស្កាត់បទល្មើសគ្រឿងញៀននៅតាមខ្សែបន្ទាត់ព្រុំដែន កម្ពុជា ឡាវ ដើម្បីធ្វើឱ្យខេត្តគោលដៅមួយនេះគ្មានការនាំគ្រឿងញៀនឬថ្នាំញៀនឆ្លងកាត់។ ក្នុងបេសកកម្មបង្កើនសកម្មភាពទប់ស្កាត់និងបង្ក្រាបបទល្មើសគ្រឿញៀនឆ្លងដែនដឹកនាំដោយអាជ្ញាធរជាតិប្រយុទ្ធប្រឆាំងគ្រឿងញៀន លោកឧត្តមសេនីយ៍ឯក យី សិទ្ធិ ប្រធាននាយកដ្ឋានអនុវត្តច្បាប់ នៃអាជ្ញាធរជាតិប្រយុទ្ធប្រឆាំងគ្រឿងញៀន ក្រសួងមហាផ្ទៃមានប្រសាសន៍ថា៖ សកម្មភាពធ្វើល្បាតនេះគឺយើងដាច់ខាតមិនឱ្យក្រុមប្រព្រឹត្តបទល្មើសជួញដូរគ្រឿងញៀន យកភូមិសាស្ត្រទឹកដីនៃខេត្តស្ទឹងត្រែងធ្វើជាតំបន់ឆ្លងកាត់នាំថ្នាំញៀន ចូលមកទឹកដីនៃប្រទេសកម្ពុជាយើងបានឡើយ ។ លោកឧត្តមសេនីយ៍ឯកបន្តថា៖កម្លាំងចុះដែលនៅប្រចាំការត្រូវធ្វើល្បាតព្រំដែនកម្ពុជា-ឡាវ ឱ្យបានញឹកញាប់ទាំងនៅតាមផ្លូវខ្សែបន្ទាត់ព្រុំដែនឱ្យបានសកម្ម ចាប់ពីបង្គោលព្រំលេខ០៣៥ទៅ- និងនៅតាមភូមិសាស្ត្រ ផ្លូវទឹកតាមដងទន្លេមេគង្គលើ- ចំណុចកោះល្ង-អន្លង់ផ្សោតព្រះរំកិល-ស្ថិតក្នុងភូមិសាស្ត្រស្រុកបុរីអូរស្វាយសែនជ័យ ខេត្តស្ទឹងត្រែងយើងនេះ។
លោក ធូ ចាន់ពៅ និងអភិបាលរងខេត្តស្ទឹងត្រែង និងជាប្រធានលេខាធិការដ្ឋាន ត្រួតពិនិត្យគ្រឿងញៀនខេត្តបានបញ្ជាក់ថា៖ បន្ទាប់ពីអាជ្ញាធរជាតិប្រយុទ្ធប្រឆាំងគ្រឿងញៀន ដាក់ខេត្តស្ទឹងត្រែង ជាខេត្តគោលដៅពង្រឹងការទប់ស្កាត់ ការចរាចរណ៍គ្រឿងញៀនខុសច្បាប់ ចេញពីតំបន់ត្រីកោណមាសមក កម្លាំងសមត្ថកិច្ចប្រចាំការនៅតាមព្រំដែនកម្ពុជា-ឡាវ បានសហការគ្នាល្អ បង្កើនកិច្ចសហប្រតិបត្តិការបង្ក្រាបការជួញដូរគ្រឿងញៀន។ លោកអភិបាលរងបន្តថា សកម្មភាពចុះល្បាតតាមបណ្តោយព្រំដែននាពេលនេះគឺជាការចុះត្រួតពិនិត្យ នៅតំបន់ត្រីកោណមាស ១៥-១១ ស្ទឹងត្រែង ដំណាក់កាលទី២ដូចជាការត្រួតពិនិត្យរថយន្តចេញចូលដឹកទំនិញចេញចូលជាដើម។
លោកឆនឬទ្ធីប្រជាពលរដ្ឋនៅឃុំអូរស្វាយបានគាំទ្រវិធានការនេះ ព្រោះកន្លងមកមានប្រជាពលរដ្ឋយើងរងគ្រោះដោយសារថ្នាំញៀន ដែលបងប្អូនយើង ភាគច្រើនចាញ់បោកតាមការញុះញង់ ដោយចង់បានប្រាក់តិចតួច ធ្វើឱ្យសមត្ថកិច្ចចាប់ខ្លួនដាក់ទោស បែកបាក់ក្រុមគ្រួសារ។
សូមបញ្ជាក់ថា៖បទល្មើសគ្រឿងញៀន នៅតានព្រំដែនខេត្តស្ទឹងត្រែង សមត្ថកិច្ចធ្លាប់ធ្វើការបង្ក្រាបនិងដកហូតបានថ្នាំញៀនមានបរិមាណច្រើនរយគីឡូក្រាម ដែលក្រុមឧក្រិដ្ឋជនដឹកតាមរថយន្ត- តាមម៉ូតូ- តាមគោយន្ត-និងប្រើទូកដឹកតាមផ្លូវទឹកក៏មាន ៕