សង្ស័យងងុយដេក ងោកមួយភ្លែត ជ្រុលចង្កូតបុកក្បាលនាគ ពុះចែកទ្រូងផ្លូវ

ដោយ រតនា

ភ្នំពេញ: បុរសម្នាក់សង្ស័យងងុយដេក ងោកមួយភាំង បើកភ្លែក មកស្រាប់តែថយន្ត រេចង្កូតទៅបុកក្បាលនាគពុះចែកទ្រូងផ្លូវពេញទំហឹង បណ្ដាលឲ្យរថយន្តរួញមួយកំណាត់មុខ។

ហេតុការណ៍នេះកើតឡើងកាលពីវេលាម៉ោង ១២និង២០ នាទីរំលងអធ្រាតបឈានចូលថ្ងៃទី០៤ ខែមករា ឆ្នាំ២០២៣ ចំណុចមុខគល់ស្ពានអាកាសក្បាលថ្នល់ ស្ថិតនៅតាមបណ្ដោយមហាវិថីព្រះនរោត្តម ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។

តាមប្រភពព័ត៌មានពីប្រជាពលរដ្ឋបានប្រាប់ឲ្យដឹងថានៅមុនពេលកើតហេតុបានឃើញបុរសម្នាក់បានបើករថយន្តមួយគ្រឿងម៉ាក Lexus Rx450h ពណ៌មាស ពាក់ស្លាកលេខ ខេមរៈភូមិន្ទ 02 ២-2504 បានធ្វើដំណើរតាមបណ្ដោយមហាវិថីព្រះនរោត្តម ទិសដៅពីជើងទៅត្បូង ក្នុងល្បឿនយ៉ាងលឿន ខណៈពេលដែលមកដល់ចំណុចកើតហេតុ សង្ស័យតៃកុង ងងុយដេកពេក ងោគមួយភាំង បើកភ្នែកមកស្រាប់តែ រថយន្តរេចង្កូត ជ្រុលទៅបុកក្បាលនាគពុះចែកទ្រូងផ្លូវពេញទំហឹងបណ្ដាលឲ្យរថយន្ត រួញមួយកំណាត់មុខ គាប់ជាប់ក្បាលនាគពុះចែកទ្រូងផ្លូវទៅមុខលែងរួច។ ចំណែកតៃកុងរថយន្តបានរងរបួសស្រាលបានគេចចេញពីកន្លែងកើតហេតុបាត់។

ក្រោយពេលកើតហេតុកម្លាំងសមត្ថកិច្ច ជំនាញនៃការិយាល័យចរាចរណ៍ផ្លូវគោកនៃស្នងការនគរបាលរាជធានីភ្នំពេញ ចុះមកពីទីតាំងកើតហេតុនិងធ្វើការអស់វែងយករថយន្តបង្កទៅរក្សាទុកដើម្បីរង់ចាំធ្វើការដោះស្រាយនៅពេលក្រោយ៕