សង្ស័យឆ្លងចរន្ត ឆេះម៉ូតូ៣គ្រឿង និង រថយន្តមួយគ្រឿង

ដោយ រតនា

ភ្នំពេញ៖ យ៉ាងហោចណាស់ម៉ូតូ៣គ្រឿង និងរថយន្តមួយគ្រឿង ត្រូវបានឆាបឆេះ ក្នុងហេតុការណ៍អគ្គិភ័យឆេះផ្ទះWING [ ធី មុំ ] ។

ហេតុការណ៍នេះកើតឡើងកាលពីវេលាម៉ោង ១និង៤០នាទីរំលងអធ្រាត្រ ឈានចូលថ្ងៃទី៦ ខែមករា ឆ្នាំ២០២៣ ស្ថិតនៅផ្លូវបេតុង ក្រុមទី៣ ភូមិឫស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ។

តាមប្រភពព័ត៌មានពីប្រជាពរដ្ឋដែលស្ថិតនៅកន្លែងកើតហេតុបានអោយដឹងថា៖ មុនពេលកើតហេតុ គេបានលឺសម្លេងផ្ទុះចេញពីផ្ទះវីងដូរលុយមួយកន្លែង ដែលមានស្លាកយីហា ធី មុំ មួយស្ទុះក្រោយមក គេឃើញមានអណ្តាតភ្លើងឆាបឆេះខ្លាំងឡើងៗផងដែរ។

ឃើញដូចនេះប្រជាពលរដ្ឋ បាននាំគ្នាស្រែក និងយកបំពង់ឧស្ម័នពន្លត់អគ្គិភ័យបាញ់ពន្លត់អស់២បំពង់ តែភ្លើងមិនរលត់ក៏បង្កជាផ្សែងហ៊ុយខ្លាំង ទើបប្រជាពលរដ្ឋផ្តល់ព័ត៌មានទៅកាន់សមត្ថកិច្ចមូលដ្ឋាន ដើម្បីសុំជំនួយពីរថយន្តពន្លត់អគ្គិភ័យ។

ក្រោយទទួលដំណឹងនេះសមត្ថកិច្ចមូលដ្ឋានបានទាក់ទងទៅកាន់ភ្នាក់ងារអន្តរាគមន៍បង្ការពន្លត់អគ្គិភ័យ ដើម្បីចេញរថយន្តរបស់ស្នាក់ការខណ្ឌច្បារអំពៅមកមួយគ្រឿងដើម្បីអន្តរាគមន៍បាញ់ពន្លត់។ បន្ទាប់មកគេឃើញរថយន្តសហការរបស់បុរីប៉េងហួត១គ្រឿង និងរថយន្តរបស់ការិយាល័យនគរបាលបង្ការពន្លត់អគ្គិភ័យនិងសង្គ្រោះ នៃស្នងការដ្ឋាននគរបាលរាជធានីភ្នំពេញ១គ្រឿងទៀតមកដល់កន្លែងកើតហេតុ។

សូមរម្លឹកថា៖ តាមការឲ្យដឹងពីម្ចាស់ផ្ទះ បានសង្ស័យថាឆ្លងចរន្តអគ្គិសនីពីទូរទឹកកក ក្លាស្សេការ៉េម ដែលបណ្តាលឆេះនិងរាលដាល ទៅកាន់កំប៉ុងហ្គាសតូចៗ និងបន្តឆាបឆេះដល់រថយន្ត Lexus RX300 មួយគ្រឿង និងម៉ូតូ៣គ្រឿង កង់១គ្រឿង រួមទាំងសម្ភារៈមួយចំនួនផងដែរ។

បច្ចុប្បន្នអគ្គិភ័យត្រូវបានរលត់ទាំងស្រុង នៅវេលាម៉ោង២និង២០នាទីយប់ ថ្ងៃដដែល ក្រោយមានការអន្តរាគមន៍បាញ់ពន្លត់ពីរថយន្តសង្គ្រោះ ដោយប្រើទឹកបាញ់អស់២គ្រឿង៕