ដោយ រតនា
ភ្នំពេញ៖ អគ្គិភ័យឆេះរថយន្តសេរីទំនើបចំនួន០៣គ្រឿង ក្នុងឃ្លាំងស្ទុករថយន្តមួយកន្លែងបង្កការភ្ញាក់ផ្អើលយ៉ាងខ្លាំង ខូចខាតរាបសែនដុល្លា។
ហេតុការណ៍នេះបានកើតឡើងកាលពីវេលាម៉ោង៥ព្រឹក ថ្ងៃទី១០ ខែមករា ឆ្នាំ២០២៣ ស្ថិតនៅចំណុចឃ្លាំងលេខ២៣៤ ស្ថិតនៅតាមបណ្តោយផ្លូវ១៨៨ ស្ថិតក្នុងសង្កាត់ផ្សារដេប៉ូ១ ខណ្ឌទួលគោក រាជធានីភ្នំពេញ។
តាមប្រភពព័ត៌មានពីកន្លែងកើតហេតុបានឲ្យដឹងថាមុនពេលកើតហេតុ គេបានប្រទះឃើញផ្សែងហ៊ុយចេញពីឃ្លាំងខាងក្រោយនៃទីតាំងកើតហេតុ បន្ទាប់មកស្រាប់តែមានអណ្តាតភ្លើងឆាបឆេះរថយន្តមួយគ្រឿងម៉ាក Lexus LM300h បង្កការភ្ញាក់ផ្អើលយ៉ាងខ្លាំង។ ភ្លាមៗនោះប្រជាពលរដ្ឋ បានយកបំពុងស្ម័នបាញ់ពន្លត់ជាបឋម ប៉ុន្តែដោយសារតែឆាបឆេះខ្លាំង បណ្តាលឲ្យរាលដាលទៅដល់រថយន្តចំនួន២គ្រឿងទៀតម៉ាក ប៊េនលី និង 4Runner ទើបប្រជាពលរដ្ឋ ទាក់ទងទៅកាន់សមត្ថកិច្ចមូលដ្ឋាន ដើម្បីសុំការអន្តរាគមន៍ពីរថយន្តពន្លត់អគ្គិភ័យ។
ក្រោយពីទទួលដំណឹងនេះ ការិយាល័យនគរបាលបង្ការពន្លត់អគ្គិភ័យ និងសង្គ្រោះនៃស្នងការដ្ឋាននគរបាលរាជធានីភ្នំពេញ បានចេញរថយន្តពន្លត់អគ្គិភ័យអន្តរាគមន៍ភ្លាមៗផងដែរ។ ដោយនៅក្នុងហេតុការណ៍អគ្គិភ័យនេះ មិនបានបណ្តាលឲ្យនរណាម្នាក់រងរបួសនោះទេ ចំពោះមូលហេតុនៃការឆាបឆេះ សមត្ថកិច្ចជំនាញកំពុងធ្វើការស្រាវជ្រាវ។
បច្ចុប្បន្ន ករណីអគ្គិភ័យឆាបឆេះឃ្លាំងស្តុករថយន្តខាងលើ ត្រូវបានរលត់ទាំងស្រុងនាម៉ោង៥និង៥០នាទីព្រឹក ថ្ងៃដដែល ដោយប្រើប្រាស់រថយន្តពន្លត់អគ្គិភ័យ អស់ចំនួន១៧គ្រឿង បាញ់ទឹកអស់ទាំង១៧គ្រឿង៕
