ដោយ រតនា
ភ្នំពេញ៖ កម្លាំងគណៈបញ្ជាការឯកភាពខណ្ឌ ៧មករា បានចុះមកត្រួតពិនិត្យនិងចាត់វិធានការក្ដៅចំពោះទីតាំងទទួលផ្ញើម៉ូតូ ២៤ម៉ោងលើ ២៤ម៉ោងក្នុងភូមិសាស្ត្រខណ្ឌ៧មករា ក្រោយអាជ្ញាធរធ្វើការអប់រំណែនាំ និង កិច្ចសន្យាជាច្រើនលើកច្រើនសារមកហើយ តែម្ចាស់អាជីវកម្មទាំងនោះមិនចូលរួមសហការជាមួយអាជ្ញាធរ។
ប្រតិបត្តិការនេះបានធ្វើឡើងនៅវេលាម៉ោង ៩យប់ថ្ងៃទី ១៧ ខែកុម្ភៈ ឆ្នាំ២០២៣ ក្រោមការដឹកនាំបញ្ជាផ្ទាល់របស់ លោក ថេង សុថុល អភិបាលនៃ គណៈអភិបាលខណ្ឌ៧មករា ចុះអនុវត្តន៍ ចាត់វិធានការក្ដៅទៅលើទីតាំងទទួលផ្ញើម៉ូតូ ២៤ម៉ោងទាំង៣៨ទីតាំងក្នុងមូលដ្ឋានខណ្ឌ៧មករា ដែលរំលោភលើផ្លូវសាធារណៈដោយលើកយកម៉ូតូដែលទទួលផ្ញើដាក់លើទ្រូងផ្លូវយកទៅរក្សាទុកនៅសាលាខណ្ឌ ៧មករាដើម្បីចាត់ការតាមនីតិវិធី។
លោក ថេង សុថុល អភិបាលនៃគណៈអភិបាលខណ្ឌ ៧មករា បានឲ្យដឹងថាមុនឈានដល់វិធានការនេះកម្លាំងអាជ្ញាធរសង្កាត់ និង ប៉ុស្តិ៍រដ្ឋបាលបានធ្វើការអប់រំណែនាំ និង កិច្ចសន្យាជាច្រើនលើកច្រើនសារមកហើយ ជាមួយម្ចាស់អាជីវកម្ម តែ ម្ចាស់ អាជីវកម្មនៅតែមិនចូលរួមសហការជាអាជ្ញាធរ រហូតដល់រដ្ឋបាលខណ្ឌក៏បានអញ្ជើញម្ចាស់ប្រកបអាជីវកម្មទទួលផ្ញើម៉ូតូ ២៤ ម៉ោងទៅធ្វើការអប់រំណែនាំ និងកិច្ចសន្យាផងដែរ។
លោកអភិបាលខណ្ឌ បានបន្តទៀតថាទីតាំងទទួលផ្ញើម៉ូតូ ២៤ម៉ោងនៅក្នុងមូលដ្ឋានខណ្ឌ ៧មករា មានចំនួន ៣៨ទីតាំង ដោយក្នុងនោះដែរលោកបានបញ្ជាក់ថាមិនមែនមិនឲ្យពួកគាត់ប្រកបអាជីវកម្មទទួលនោះទេ តែលោកអភិបាលសំណូមពរឲ្យម្ចាស់អាជីវកម្មចូលរួមសហការជាមួយអាជ្ញាធរ គឺមិនអនុញ្ញាតឲ្យទទួលផ្ញើម៉ូតូដាក់លើទ្រូងផ្លូវឡើយ។ ប៉ុន្តែអនុញ្ញាតឲ្យដាក់ត្រឹមចិញ្ចើមផ្លូវនៅពេលយប់ រហូតដល់ម៉ោង ៦ ទៅ ម៉ោង៧ព្រឹក នៅលើចិញ្ជើមផ្លូវត្រូវយកម៉ូតូចេញអស់ពីចិញ្ជើមផ្លូវ៕
