ក្រុមហ៊ុនTesla នឹងប្រមូលរថយន្តជាង 360 ពាន់គ្រឿងដែលបំពាក់ដោយប្រព័ន្ធបើកបរដោយខ្លួនឯង(Full Self-DrivingឬFSD) ដែលនិយតករនិយាយថាអាចបង្កើនហានិភ័យនៃគ្រោះថ្នាក់។ក្រុមហ៊ុនផលិតរថយន្តអគ្គិសនីរបស់សហរដ្ឋអាមេរិកខាងលើបានចេញសេចក្ដីជូនដំណឹងអំពីការប្រមូលមកវិញជាមួយរដ្ឋបាលសុវត្ថិភាពចរាចរណ៍ផ្លូវជាតិ(NHTSA)។
Tesla នឹងប្រមូលរថយន្ត៤ម៉ូដែល នៅសហរដ្ឋអាមេរិកដែលបានបំពាក់ដោយប្រព័ន្ធបើកបរស្វ័យភាពពេញលេញដែលក្រុមហ៊ុនកំពុងអភិវឌ្ឍ។
សម្រាប់ម៉ូដែលរថយន្តដែលនឹងប្រមូលនោះមានដូចជារថយន្ដស៊េរីឆ្នាំ 2016-2023 Model S និង Model X SUVs រថយន្តធុនតូច Model 3 ឆ្នាំ 2017-2023 និងរថយន្ត Model Y SUVsផលិតនៅឆ្នាំ 2020-2023។
NHTSA និយាយថា ប្រព័ន្ធនេះអាចបង្កឱ្យមានគ្រោះថ្នាក់ ព្រោះវាអនុញ្ញាតឱ្យរថយន្តធ្វើដំណើរត្រង់ទៅមុខត្រង់ផ្លូវប្រសព្វ ទោះបីជាវាស្ថិតក្នុងគន្លងផ្លូវបត់ក៏ដោយ។ប្រព័ន្ធផ្សព្វផ្សាយរបស់សហរដ្ឋអាមេរិកបានរាយការណ៍ថា រថយន្ត Tesla ដែលមានប្រព័ន្ធ FSD របស់ខ្លួនសកម្មបានបង្កគ្រោះថ្នាក់នៅក្នុងរដ្ឋកាលីហ្វ័រញ៉ាកាលពីខែវិច្ឆិកាឆ្នាំមុន ដោយបានធ្វើឱ្យមនុស្ស9នាក់រងរបួស៕
