ដោយ រតនា
ភ្នំពេញ៖ កម្លាំងនគរបាលព្រហ្មទណ្ឌក្រសួងមហាផ្ទៃ ដឹកនាំសហការជាមួយកម្លាំងនគរបាលខេត្តកំពង់ឆ្នាំង ឃាត់ខ្លួនជនសង្ស័យម្នាក់ពាក់ព័ន្ធករណីឃាតកម្មចាក់សម្លាប់ជនរងគ្រោះចំនួន ១៥កាំបិតបណ្ដាលឲ្យស្លាប់ នៅកន្លែងកើតហេតុ។ការឃាត់ខ្លួនជនសង្ស័យធ្វើឡើងនៅវេលាម៉ោង៥និង៣០នាទីល្ងាចថ្ងៃទី២២ ខែមីនា ឆ្នាំ២០២៣ ចំណុចផ្លូវលេខ១៣៦ ឃុំវាំងចាស់ ស្រុកឧដុង្គ ខេត្តកំពង់ស្ពឺ។
ប្រតិបត្តិការនេះធ្វើឡើងក្រោមការដឹកនាំចង្អុលបង្ហាញផ្ទាល់ពីឯកឧត្តម នាយឧត្តមសេនីយ៍ សន្ដិបណ្ឌិត នេត សាវឿន អគ្គស្នងការនគរបាលជាតិ ឯកឧត្តមឧត្តមសេនីយ៍ឯក មួង សុធា អគ្គស្នងការរងទទួលផែនយុតិធម៌ និងបញ្ជាដឹកនាំដោយ ឯកឧត្តម ឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌយ៉ាងយកចិត្តទុកដាក់ ។
ក្រោយពីទទួលបានបទបញ្ជាដឺម៉ឺងម៉ាត់ របស់ឯកឧត្តម នាយឧត្តមសេនីយ សន្តិបណ្ឌិត នេត សាវឿន អគ្គស្នងការនគរបាលជាតិ លោកឧត្តមសេនីយ៍ទោ ជាវ វិបុល អនុប្រធាននាយកដ្ឋាននគបាលព្រហ្មទណ្ឌក្រសួងមហាផ្ទៃ បានដឹកនាំសហការជាមួយនគរបាលជំនាញព្រហ្មទណ្ឌនៃស្នងការដ្ឋាននគរបាលខេត្តកំពង់ឆ្នាំង និងមូលដ្ឋានស្រុកឧដុង្គ បានធ្វើការស្រាវជ្រាវ រហូតឈានដល់ការកំណត់មុខសញ្ញានិងឃាត់ខ្លួនបានសម្រេច។
ក្រោយការឃាត់ខ្លួនជនសង្ស័យដែលមានឈ្មោះ វ៉ន រិទ្ធ បានសារភាពថាខ្លួនពិតជាបាន ចាក់សម្លាប់ជនរងគ្រឿង ឈ្មោះ នុត សារឿង ប្លន់យក នាឡិកាដៃ ទូរស័ព្ទ១គ្រឿង និងម៉ូតូ០១គ្រឿង មែន។
គួរបញ្ជាក់ផងដែរកាលពីរសៀលថ្ងៃទី២១ ខែមិនាឆ្នាំ ២០២៣ ម្សិលមិញនេះ មុនពេលកើតហេតុជនរងគ្រោះនៅផ្ទះក៏បានឃើញជនសង្ស័យកំពុងដើររួចក៏បានហៅមកចូលអង្គុយផឹកស៊ីជាមួយគ្នា។ស្រាប់តែពេលអង្គុយផឹកជនសង្ស័យបានដកកាំបិតត្នោតចាកសម្លាប់ទៅលើជនរងគ្រោះចំនួន១៥កាំបិតរួចយកសម្ភារៈ នាឡិកាដៃ ទូរស័ព្ទ១គ្រឿង និងម៉ូតូ០១គ្រឿង គេចខ្លួន មកស្នាក់នៅផ្ទះសង្សារនៅឯខេត្តកំពង់ស្ពឺ។
ក្រោយហេតុការណ៍កម្លាំងនគរបាលជំនាញខេត្តកំពង់ឆ្នាំងនិងកម្លាំងនគរបាលនាយកដ្ឋានព្រហ្មទណ្ឌក្រសួងមហាផ្ទៃបានធ្វើការស្រាវជ្រាវរហូតឃាត់ខ្លួនជនសង្ស័យបានរួចប្រគល់ជូនស្នងការដ្ឋាននគរបាលខេត្តកំពង់ឆ្នាំងដើម្បីបន្តនីតិវិធី៕
