ទំនាស់រវាងជនបរទេស ២ក្រុម ខណៈម្ខាងមានកាំបិត និងភាគីម្ខាងទៀតមានកាំភ្លើង ដកបាញ់ស្លាប់ម្នាក់នៅសង្កាត់ទួលស្វាយព្រៃទី១

ដោយ រតនា

ភ្នំពេញ៖ បុរសជនបរទេសម្នាក់ ត្រូវបានខ្មាន់កាំភ្លើងដកបាញ់ស្លាប់ភ្លាសមៗយ៉ាងអាណោចអាធ័ម បន្ទាប់ពីឈ្លោះទាស់ទែងគ្នាមួយប្រាវ ដោយជនរងគ្រោះបានដកកាំបិត ប៉ុន្តែភាគីជនសង្ស័យមានកាំភ្លើង ក៏បានដកបាញ់ ៤គ្រាប់ផ្ទួនៗ រួចនាំគ្នារត់ឡើងឡានរត់គេចខ្លួនបាត់ស្រមោល។

ហេតុការណ៍នេះបានកើតឡើងកាលពីវេលាម៉ោង ២៖០០រសៀល ថ្ងៃទី២៩ ខែកក្កដា ឆ្នាំ២០២៣ ចំណុចផ្លូវ៣៦០ កែងផ្លូវ១៦៣ សង្កាត់ទួលស្វាយព្រៃទី១ ខណ្ឌបឹងកេងកេង រាជធានីភ្នំពេញ។

តាមប្រភពព័ត៌មានបានឲ្យដឹងថា មុនពេលកើតហេតុ គេបានឃើញជនរងគ្រោះ និងខ្មាន់កាំភ្លើង បានមានទំនាស់ទាស់ទែងគ្នា ដោយមានកាន់កាំបិតថែមទៀត ពេលនោះជនរងគ្រោះក៏ដើរចេញ ស្រាប់តែភាគីម្ខាងទៀត ដែលជាឃាតក និងជាជនដៃដល់ បានទាញកាំភ្លើង ដេញបាញ់បុរសរងគ្រោះជាច្រើនគ្រាប់ផ្ទួនៗគ្នា ដោយជនរងគ្រោះបានព្យាយាមរត់ឲ្យគេជួយដែរ តែត្រូវជនដៃដល់ បាញ់ស្លាប់យ៉ាងរន្ធត់   រួចប្រញាប់រត់ឡើងជិះរថយន្តឡិចស៊ីស NX200t ដើម្បីគេចខ្លួនបាត់តែម្តង ។

បើតាមការបញ្ជាក់បឋមពីសមត្ថកិច្ចជនរងគ្រោះជាជនបរទេស តែមិនទាន់ដឹងជនជាតិអ្វីនៅឡើយ អាយុប្រហែល ៣០ឆ្នាំជាង ស្លៀកខោខ្លី ពណ៌សាច់ ជើងខ្លី ពាក់អាវស ដៃវែង ស្ពាយកាបូបពណ៌ខ្មៅ ពាក់ស្បែកជើងស៊ក ហើយបើតាមការធ្វើកោសល្យវិច័យ នៅទីតាំងកើតហេតុផ្ទាល់ ឃើញមានគ្រាប់ចំនួន ៤គ្រាប់ ។

ជុំវិញករណីនេះ សមត្ថកិច្ចជំនាញ គ្រប់លំដាប់ថ្នាក់ មានទាំងប៉ុស្តិ៍ ខណ្ឌ ព្រហ្មទណ្ឌរាជធានីភ្នំពេញ ព្រហ្មទណ្ឌក្រសួងមហាផ្ទៃ បានហ៊ុព័ទ្ធទីតាំងកើតហេតុ ខាងលើ និងប្រមូលសំបកគ្រាប់ និងកំពុងបើកការស្រាវជ្រាវតាមចាប់ឃាតករខាងលើ៕