អន្តរជាតិ៖មន្ត្រីសុខាភិបាលក្នុងប្រទេសប៉ាគីស្ថានបាននិយាយថា មនុស្សចំនួន ៣៩នាក់បានស្លាប់ និងជាង ១២០នាក់ផ្សេងទៀតបានរងរបួសនៅក្នុងហេតុការផ្ទុះគ្រាប់បែកនៅឯការជួបជុំនយោបាយមួយ។
មកទល់ពេលនេះគ្មានក្រុមណាមួយបានអះអាងទទួលខុសត្រូវចំពោះការបំផ្ទុះនេះនោះទេ ខណៈដែលប៉ូលិសសង្ស័យថាជាការបំផ្ទុះអត្តឃាត។
ការបំផ្ទុះគ្រាប់បែកបានកើតឡើងកាលពីថ្ងៃអាទិត្យនៅឯការប្រមូលផ្តុំនៃគណបក្សអ៊ីស្លាមនៅក្នុងទីក្រុងមួយជាប់ព្រំដែនអាហ្វហ្គានីស្ថានក្នុងខេត្ត Khyber Pakhtunkhwa ភាគពាយ័ព្យប្រទេសប៉ាគីស្ថាន។
វីដេអូពីមន្ទីរពេទ្យក្នុងស្រុកបង្ហាញអ្នករបួសត្រូវបានគេនាំទៅទីនោះម្តងមួយៗ ទោះបីជាខាងក្នុងមានមនុស្សច្រើនកុះករក៏ដោយ។
បណ្ដាគណបក្សនយោបាយកំពុងបង្កើនយុទ្ធនាការអំពាវនាវដល់អ្នកបោះឆ្នោត ខណៈអាណត្តិនៃសភាជាន់ទាបជាតិផុតកំណត់នៅខែសីហា។
ទន្ទឹមគ្នានេះហានិភ័យនៃអំពើភេរវកម្មមាននិន្នាការកើនឡើងក្នុងអំឡុងពេលយុទ្ធនាការបោះឆ្នោតនៅក្នុងប្រទេសប៉ាគីស្ថាន។ នៅឆ្នាំ ២០០៧ ការវាយប្រហារដោយគ្រាប់បែកអត្តឃាតបានសម្លាប់អតីតនាយករដ្ឋមន្ត្រី Benazir Bhutto ដែលជាមេដឹកនាំបក្សប្រឆាំងនៅពេលនោះ៕
