អន្តរជាតិ៖បាតុកម្មប្រឆាំងបារាំងមានកាន់តែខ្លាំងឡើងនៅក្នុងប្រទេសនីហ្ស៊េ បន្ទាប់ពី ប្រធានាធិបតីគាំទ្រដោយលោកខាងលិចលោក Mohamed Bazoumត្រូវបានបណ្តេញចេញពីអំណាចក្នុងរដ្ឋប្រហារយោធាកាលពីថ្ងៃពុធសប្តាហ៍មុនដោយសមាជិកនៃឆ្មាំប្រធានាធិបតី។
មេដឹកនាំរដ្ឋប្រហារបានប្រកាសពីការបង្កើតរដ្ឋាភិបាលយោធាដែលដឹកនាំដោយឧត្តមសេនីយAbdourahamane Tiani ។
ភាពចលាចលផ្នែកនយោបាយបានបង្កឱ្យមានការតវ៉ាប្រឆាំងនឹងអតីតអាណានិគមបារាំងនៃប្រទេសអាហ្វ្រិកខាងលិចខាងលើនៅក្នុងរដ្ឋធានី Niamey។ក្រុមបាតុករគប់ដុំថ្មនិងវត្ថុផ្សេងៗចូលស្ថានទូតបារាំង បង្ករឲ្យខូចខាតទ្រព្យសម្បត្តិស្ថានទូតមួយចំនួន។
មានការប្រឆាំងនឹងបារាំងនៅប្រទេសនីហ្ស៊េនិងប្រទេសអាហ្វ្រិកខាងលិចផ្សេងទៀត ដែលធ្លាប់ជាអាណានិគមរបស់បារាំង។
ប្រទេសបារាំងបានរក្សាឥទ្ធិពលលើនយោបាយ និងសេដ្ឋកិច្ចរបស់អតីតអាណានិគម។
ពលរដ្ឋក្នុងប្រទេសទាំងនោះមានការខកចិត្តចំពោះអន្តរាគមន៍យោធារបស់ប្រទេសបារាំង និងប្រទេសផ្សេងទៀតប្រឆាំងនឹងក្រុមជ្រុលនិយមអ៊ិស្លាម ដែលពួកគេមានអារម្មណ៍ថាមានការរីកចម្រើនតិចតួច។
ប្រទេសជិតខាងរបស់នីហ្ស៊េ ម៉ាលី និងបួគីណាហ្វាសូ ធ្លាប់មានរដ្ឋប្រហារក្នុងប៉ុន្មានឆ្នាំថ្មីៗនេះ។ មេដឹកនាំយោធារបស់ពួកគេបាននិងកំពុងកសាងទំនាក់ទំនងកាន់តែជិតស្និទ្ធជាមួយរុស្ស៊ី។
បណ្តាប្រទេសលោកខាងលិចមានការព្រួយបារម្ភថា មេដឹកនាំយោធាថ្មីរបស់នីហ្ស៊េអាចនឹងខិតទៅជិតទីក្រុងមូស្គូផងដែរ។
មេដឹកនាំនៃប្លុកតំបន់អាហ្រ្វិកខាងលិច ECOWAS បានថ្កោលទោសយ៉ាងខ្លាំងចំពោះរដ្ឋប្រហារនីហ្ស៊េនៅឯកិច្ចប្រជុំបន្ទាន់មួយកាលពីថ្ងៃអាទិត្យ។
ពួកគេបានអំពាវនាវឱ្យមាន “ការដោះលែងជាបន្ទាន់ និងការដាក់ឱ្យដំណើរការឡើងវិញ” របស់រដ្ឋាភិបាលលោក Bazoum នៅក្នុងសេចក្តីថ្លែងការណ៍មួយដែលបានចេញផ្សាយបន្ទាប់ពីកិច្ចប្រជុំ។ ពួកគេក៏បានព្រមានផងដែរថាពួកគេនឹង “ចាត់គ្រប់វិធានការទាំងអស់ដែលចាំបាច់ដើម្បីស្ដារឡើងវិញនូវសណ្តាប់ធ្នាប់រដ្ឋធម្មនុញ្ញ” រួមទាំង “ការប្រើប្រាស់កម្លាំង” លុះត្រាតែប្រធានាធិបតីដែលត្រូវបានបណ្តេញចេញពីតំណែងត្រូវបានស្តារឡើងវិញក្នុងរយៈពេលមួយសប្តាហ៍។
មេដឹកនាំយោធានីហ្ស៊េដែលគាំទ្ររដ្ឋប្រហារបានសម្តែងការប្តេជ្ញាចិត្តក្នុងការការពារមាតុភូមិរបស់ពួកគេ។
ការិយាល័យប្រធានាធិបតីបារាំងកាលពីថ្ងៃអាទិត្យបាននិយាយថា ប្រធានាធិបតី Emmanuel Macron បានបញ្ជាក់យ៉ាងច្បាស់ថា អ្នកណាក៏ដោយដែលវាយប្រហារជនជាតិបារាំង កងទ័ព អ្នកការទូត ឬទីតាំងរបស់បារាំងនឹងឃើញបារាំងសងសឹកភ្លាមៗ និងគ្មានការសម្របសម្រួល។
ការិយាល័យបានបន្ថែមថាលោកMacron នឹងមិនអត់ធ្មត់ចំពោះការវាយប្រហារណាមួយប្រឆាំងនឹងប្រទេសបារាំង និងផលប្រយោជន៍របស់ខ្លួនឡើយ៕
