អន្តរជាតិ៖ប្រព័ន្ធផ្សព្វផ្សាយដែលមានទំនាក់ទំនងជាមួយក្រុមសកម្មប្រយុទ្ធរដ្ឋឥស្លាមនិយាយថា ក្រុមនេះទទួលខុសត្រូវចំពោះការវាយប្រហារភេរវកម្មដ៏សាហាវនៅក្នុងប្រទេសប៉ាគីស្ថានកាលពីថ្ងៃអាទិត្យ។
យោងតាមអាជ្ញាធរសុខាភិបាលក្នុងតំបន់បានឱ្យដឹងថា យ៉ាងហោចណាស់មនុស្ស 45 នាក់បានស្លាប់បន្ទាប់ពីការផ្ទុះមួយបានវាយប្រហារលើការជួបជុំនយោបាយរបស់គណបក្សអ៊ីស្លាមនៅក្នុងទីក្រុងភាគពាយព្យប្រទេសប៉ាគីស្ថាន នៅជិតព្រំដែនជាមួយប្រទេសអាហ្វហ្គានីស្ថាន។ មនុស្សជាង ៦០ នាក់ផ្សេងទៀតត្រូវបានបញ្ជូនទៅកាន់មន្ទីរពេទ្យដើម្បីសង្គ្រោះជីវិត។
ប៉ូលិសប៉ាគីស្ថានសង្ស័យថា ហេតុការណ៍នេះជាការបំផ្ទុះគ្រាប់បែកអត្តឃាត។
ទីភ្នាក់ងារព័ត៌មាន Amaq នៅថ្ងៃចន្ទសប្ដាហ៍នេះ បាននិយាយថា យុទ្ធជនម្នាក់បានបំផ្ទុះគ្រាប់បែកនៅក្នុងអាវធំរបស់គាត់ នៅកណ្តាលហ្វូងមនុស្សនៃសមាជិកបក្ស និងមន្ត្រីជាន់ខ្ពស់។
Amaq បាននិយាយថាការវាយប្រហារនេះត្រូវបានធ្វើឡើងនៅក្នុងបរិបទនៃសង្រ្គាមប្រឆាំងនឹងលទ្ធិប្រជាធិបតេយ្យ ដែលស្នើឱ្យក្រុមសកម្មប្រយុទ្ធបដិសេធចោលគណបក្សនយោបាយ និងប្រព័ន្ធបោះឆ្នោតរបស់ប្រទេសប៉ាគីស្ថាន។
សូមជ្រាបថាគណបក្សនយោបាយកំពុងបង្កើនការត្រៀមខ្លួនសម្រាប់ការបោះឆ្នោត ខណៈអាណត្តិនៃសភាជាន់ទាបផុតសុពលភាពនៅខែសីហា។ ក្តីបារម្ភកំពុងកើនឡើងជុំវិញផលប៉ះពាល់នៃការវាយប្រហារភេរវកម្មចុងក្រោយបំផុតអាចមានលើយុទ្ធនាការរបស់ពួកគេ និងការវាយប្រហារជាបន្តបន្ទាប់ដែលអាចកើតមាន៕
