ម៉ូតូសណ្តោងរ៉ឺម៉កបុករះម៉ូតូពីរគ្រឿងបណ្តាលអោយមនុស្សច្រើននាក់ស្លាប់និងរបួសធ្ងន់ស្រាល
ខេត្តបាត់ដំបង! មនុស្សម្នាក់បានស្លាប់ក្រោយបញ្ជូនទៅមន្ទីរពេទ្យនិង០៣នាក់បានរងរបួសធ្ងន់និងស្រាលនៅក្នុងហេតុការណ៍គ្រោះថ្នាក់ចរាចរណ៍មួយដែលកើតឡើងរវាងម៉ូតូសណ្តោងរ៉ឺម៉កមួយគ្រឿងបុករះម៉ូតូ០២គ្រឿង និងបន្តបុកផ្ទះលក់ចាប់ហួយនៅវេលាម៉ោង២០និង២៨នាទី ថ្ងៃទី៣០.ខែកក្កដា ឆ្ឆ្នាំ២០២៣ នៅត្រង់ចំណុចភូមិកន្ទួត សង្កាត់ ក្តុលដូនទាវ ក្រុងបាត់ដំបង ។
តាមអ្នកឃើញហេតុការណ៍បានប្រាប់ថា នៅមុនពេលកើតហេតុគេឃើញម៉ូតូសណ្តោងរ៉ឺម៉កមួយគ្រឿងបើកបរជិះគ្នាពីរនាក់ក្នុងល្បឿនយ៉ាងលឿនទិសដៅពីត្បូងទៅជើង លុះមកដល់ចំណុចកើតហេតុខណៈដែលផ្លូវតូចចង្អៀតផងក៏បានជ្រុលទៅម៉ូតូ០២គ្រឿងដែលធ្វើដំណើរច្រាស់ទិសគ្នា រួចបន្តទៅបុកចូលផ្ទះលក់ចាប់ហួយបណ្តាលអោយប្រជាការពារម្នាក់និងអ្នកបើកបរម៉ូតូសរុប០៤នាក់រងរបួសធ្ងន់និងស្រាលតែម្តង ចំណែកម៉ូតូខូចខាតយ៉ាងដំណំ។
ក្រោយពេលកើតហេតុ សមត្ថកិច្ចជំនាញបានចុះទៅដល់ដឹកបញ្ជូនជនរងគ្រោះទៅសង្គ្រោះព្យាបាលនៅមន្ទីរពេទ្យ តែជាអកុសលបុរសជាម្ចាស់ម៉ូតូសង់០៦ ពាក់ផ្លាកលេខ បាត់ដំបង 1B-9553 បានស្លាប់ក្រោយបញ្ជូនទៅមន្ទីរពេទ្យ ចំណែកមធ្យោបាយទាំងអស់ត្រូវបានវាស់វែងរួចយកទៅរក្សាទុកនៅការិយាល័យចរាចរណ៍ផ្លូវគោកដើម្បីរងចាំដោះស្រាយតាមផ្លូវច្បាប់។
