អ្នកជំនាញសុខាភិបាលបានបង្ហាញវិធានការជាច្រើនដែលគួរយល់ដឹងនិងមានការប្រុងប្រយ័ត្ននៅរដូវភ្លៀងដើម្បីបង្ការជំងឺគ្រុនឈាម
លោកស្រី សាស្រ្ដាចារ្យ វេជ្ជបណ្ឌិត អ៊ីវ ម៉ាឡែន អនុប្រធានមន្ទីរពេទ្យគន្ធបុប្ផា បានឱ្យបង្ហាញពីវិធានការជាច្រើនដែលគួរយល់ដឹងនូវរដូវភ្លៀង ដើម្បីអាចបង្ការជំងឺគ្រុនឈាម នៅរដូវវស្សា។ លោកស្រី សាស្រ្ដាចារ្យ វេជ្ជបណ្ឌិត អ៊ីវ ម៉ាឡែន អនុប្រធានមន្ទីរពេទ្យគន្ធបុប្ផា បានមានប្រសាសន៍នៅក្នុងកម្មវិធីសន្ទនាមតិ«ជំហានដំបូង» ឱ្យដឹងថា គ្រុនឈាម គឺជាជំងឺ
ឆ្លង ដោយមានភ្នាក់ងារចម្លងគឺសត្វមូស (មូសខ្លា) បណ្តាលមកពីមេរោគគ្រុនឈាមចំនួន ៤ ប្រភេទ ។ លោកស្រីវេជ្ជបណ្ឌិត បន្ដថា ជំងឺគ្រុនឈាម ជារៀងរាល់ឆ្នាំ បានកើតមានភាគច្រើននៅអំឡុងរដូវភ្លៀង ដែលគួរតែបន្ថែមការប្រុងប្រយ័ត្នឱ្យបានខ្ពស់។ ដូចនេះគឺត្រូវការចូលរួមសហការទាំងអស់គ្នា ជាមួយអាជ្ញាធរ លុបបំបាត់ជម្រកមូល គេងក្នុងមុង ជាដើម ដើម្បីអាចបង្ការជំងឺគ្រុនឈាមនេះបានកម្រិតខ្ពស់។ លោកស្រីវេជ្ជបណ្ឌិត បានបញ្ជាក់ថា ជំងឺគ្រុនឈាម មិនមានការព្យាបាលជាក់លាក់ទេ ប៉ុន្តែជាធម្មតាអ្នកជំងឺ នឹងជាសះស្បើយក្នុងរយៈពេល ២ សប្តាហ៍។ សំខាន់បំផុត ត្រូវព្យាបាលទៅតាមរោគសញ្ញា ដើម្បីបញ្ចៀសផលវិបាកផ្សេងៗ។ ដោយជំងឺគ្រុនឈាមមាន២កម្រិត គឺកម្រិតមធ្យម បណ្តាលឱ្យយើងគ្រុនក្តៅខ្លាំង កន្ទួល ឈឺសាច់ដុំ និងសន្លាក់។ ក្នុងករណីធ្ងន់ធ្ងរ អាចបណ្តាលឱ្យហូរឈាមធ្ងន់ធ្ងរ សម្ពាធឈាមធ្លាក់ចុះភ្លាមៗ និងស្លាប់ទៀតផង៕
