បញ្ជាការដ្ឋានតំបន់ប្រតិបត្តិការសឹករងកំពង់ធំ យោធភូមិភាគទី៤ បូកសរុបលទ្ធផលការងារយេនឌ័រឆមាសទី១ ឆ្នាំ២០២៣ និងប្រគល់ថវិកាគោលនយោបាយរបស់រាជរដ្ឋាភិបាល ជូនយោធិននារី សម្រាកលំហែមាតុភាព
(កំពង់ធំ)÷នៅព្រឹកថ្ងៃទី០២ ខែសីហា ឆ្នាំ២០២៣ នៅទីបញ្ជាការតំបន់ប្រតិបត្តិការសឹករងកំពង់ធំ ស្ថិតនៅភូមិថ្នល់បែក ឃុំត្រពាំងឫស្សី ស្រុកកំពង់ស្វាយ ខេត្តកំពង់ធំ បានរៀបចំកិច្ចប្រជុំបូកសរុបលទ្ធផលការងារយេនឌ័រឆមាសទី១ និងដាក់ចេញនូវទិសដៅសម្រាប់អនុវត្តបន្តនៅឆមាសទី២ ឆ្នាំ២០២៣ និងប្រគល់ថវិកាគោលនយោបាយឧបត្ថម្ភរបស់រាជរដ្ឋាភិបាល តាមរយៈក្រសួងការពារជាតិ ជូនយោធិននារីចំនួន៥រូប ដែលពិធីនេះប្រព្រឹត្តទៅ ស្ថិតក្រោមអធិបតីភាពឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំយោធភូមិភាគទី៤ ។
លោកស្រីវរសេនីយ៍ទោ យូ មុន្នីរ័ត្ន នាយ សេនាធិការរង និងជាប្រធានក្រុមការងារយេនឌ័រនៃបញ្ជាការដ្ឋានតំបន់ប្រតិបត្តិការសឹករងកំពង់ធំ បានឡើងអានរបាយការណ៍លទ្ធផលសកម្មភាព ចំណុចខ្លាំង ចំណុចខ្សោយ ក្នុងការអនុវត្តការងារយេនឌ័រនៅឆមាសទី១ និងទិសដៅសម្រាប់អនុវត្តបន្តឆមាសទី២ ឆ្នាំ២០២៣។ ជាមួយនោះដែរលោកស្រីវរសេនីយ៍ទោ យូ មុន្នីរ័ត្ន ក៏បានណែនាំអំពីតួនាទីភាកិច្ចមួយចំនួនបន្ថែមទៀត ពីកិច្ចការងារយេនឌ័រ ដែលយើងទាំងអស់គ្នាត្រូវចូលរួមអនុវត្តបន្តនៅពេលខាងមុខ។
លោកវរសេនីយ៍ទោ ជាវ សុធារិទ្ធ នាយផ្នែកហិរញ្ញវត្ថុ នៃបញ្ជាការដ្ឋានតំបន់ប្រតិបត្តិការសឹករងកំពង់ធំ បានឡើងអានសេចក្តីកំណត់របស់ក្រសួងការពារជាតិ ស្ដីពីការឧបត្ថម្ភប្រាក់គោល នយោបាយរបស់រាជរដ្ឋាភិបាល ជូនយោធិននារី ដែលត្រូវបានសម្រាកលំហែមាតុភាពដោយក្នុងម្នាក់ៗទទួលបាននូវថវិកាចំនួន ៨០០.០០០ រៀ់ល។
ឧត្តមសេនីយ៍ទោ សោម ស៊ុន បានអញ្ជើញប្រគល់ថវិកាគោលនយោបាយរបស់រាជរដ្ឋា ភិបាលតាមរយៈក្រសួងការពារជាតិ ជូនដល់យោធិននារីចំនួន៥រូប ដែលបានសម្រាកលំហែមាតុភាពក្នុងរយៈពេលកន្លងមក ដោយយោធិននារីមួយរូបទទួលបាននូវថវិកាគោលនយោបាយរបស់រាជរដ្ឋាភិបាលចំនួន ៨០០.០០០រៀល និងថវិកាឧបត្ថម្ភរបស់អង្គភាពនៃបញ្ជាការដ្ឋានតំបន់ប្រតិបត្តិការសឹករងកំពង់ធំ ក្នុងម្នាក់ៗចុះនួន ២០០. ០០០ រៀលបន្ថែមទៀត សរុបយោធិននារីមួយរូប ដែលសម្រាកលំហែមាតុភាពទទួលបានថវិកាចំនួន១.០០០.០០០រៀល។
នៅក្នុងឱកាសនេះ ឧត្តមសេនីយ៍ទោ សោម ស៊ុន បានថ្លែងអំណរគុណដ៏ជ្រាលជ្រៅជាទីបំផុតចំពោះប្រមុខរាជរដ្ឋាភិបាល តាមរយៈក្រសួង ការពារជាតិ ដែលបានជួយឧបត្ថម្ភថវិកាគោល នយោបាយ សម្រាប់ដោះស្រាយដល់ការលំបាករបស់យោធិននារីក្នុងពេលសម្រាកលំហែមាតុ ភាព និងបានថ្លែងនូវការកោតសរសើរ ដល់ក្រុមការងារយេនឌ័រ និងយោធិនទាំងអស់ ទាំងបុរស និងនារី ចំណុះឲ្យបញ្ជាការដ្ឋានតំបន់ប្រតិបត្តិការសឹករងកំពង់ធំ ដែលបានចូលរួមចំណែកយ៉ាងសកម្មក្នុងការអនុវត្តនូវតួនាទីភារកិច្ចការងារយេនឌ័រនាពេលកន្លងមក និងបានប្រគល់ភារកិច្ចសំខាន់ៗមួយចំនួនជូនក្រុមការងារយ៉េនឌ័រ និងយោធិនទាំងអស់ដែលត្រូវអនុវត្តន៍ផងដែរ។
