ព្រោះតែជីវភាពខ្វះខាតលោកតាអាយុ៨៤ឆ្នាំជិះទូកទៅមើលមងធ្លាក់ចូលទឹកស្លាប់
ភ្នំពេញ៖លោកតាអាយុ៨៤ឆ្នាំ ម្នាក់បានធ្លាក់ចូលទឹកស្រះរណ្តៅជីករបស់តាសុនស្លាប់ កាលពីវេលាម៉ោងប្រមាណ៦ព្រឹកថ្ងៃទី០២ខែសីហា ឆ្នាំ ២០២៣ នៅក្នុងស្រះទឹកដែលស្ថិតនៅភូមិ វិមានទ្រុង សង្កាត់ក្រាំងធ្នង់ខណ្ឌសែនសុខ រាជធានីភ្នំពេញបន្ទាប់ពីគាត់ជិះទូកទៅមើលមង។
លោកតាដែលធ្លាក់ទឹកស្លាប់នោះឈ្មោះស៊ុំ សានអាយុ៨៤ឆ្នាំស្នាក់នៅក្នុងខ្ទម ជាមួយកូនប្រុសស្រី២នាក់ នៅមាត់ស្រះទឹកខាងលើ ។
តាមកូនប្រុសឈ្មោះស៊ុំ គា អាយុ៤៣ឆ្នាំ បានអោយដឹងថា ជាទូទៅឪពុករបស់ខ្លួនបានក្រោកទៅមើលមងនៅវេលាម៉ោងប្រមាណ៤ទៅ៥ភ្លឺហើយ នៅវេលាម៉ោងប្រមាណ៦ព្រឹកគាត់យកត្រីមកលក់ស្រាប់តែ នៅព្រឹកនេះ បាត់ឃាត់មិនឃើញ ក៍បានដើរទៅមើលស្រះទឹកដ៍ធំល្វឹងល្វើយដែលមានជម្រៅប្រមាណ៣០មែត្រប្រទះឃើញ ទូក អណ្តែតរសាត់តាមខ្យល់ទៅទើនឹងច្រាំងនៅផ្នែកខាងជើង។
តាមព័ត៌មានអោយដឹងទៀតថា បន្ទាប់ពី ប្រទះឃើញ ទូកកូនប្រុសក៍មានការសង្ស័យថា គាត់បានធ្លាក់ទឹកស្លាប់ហើយនៅវេលាម៉ោងប្រមាណជាង៨ព្រឹក ក៍បានអ៊ំទូកទៅរកនិងបានស្រាវមងស្រាប់តែ ប្រទះឃើញ សពឪពុក ជាប់មង។
តាមកូន ប្រុសស្រីបានអោយដឹងថា កាលពីម្សិលមិញឪពុក បានត្អូញប្រាប់ថា មិនស្រួលខ្លួន ហើយ ដៃ ម្ខាងដែលគាត់ត្រូវចរន្តអគ្គីសនីឆក់ក៍បានរើឡើង ឈឺនិងស្ពឹក មិននឹកស្រានថា គាត់ធ្លាក់ទឹកស្រះស្លាប់បែបនេះ។
បច្ចុប្បន្នសពជនរងគ្រោះត្រូវបានសមត្ថកិច្ចប្រគល់ជូនសាច់ញាតិនិងក្រុមគ្រួសារយកទៅធ្វើបុណ្យតាមប្រពៃណី៕
