អន្តរជាតិ៖អ៊ុយក្រែនបានបញ្ជាក់ថា មន្ត្រីជាន់ខ្ពស់មកពីក្រុមប្រទេសសេដ្ឋកិច្ចលូតលាស់ទាំងប្រាំពីរ (G7)ក៏ដូចជាប្រទេសកំពុងរីកចម្រើន និងកំពុងអភិវឌ្ឍន៍(Global South) នឹងជួបប្រជុំនៅប្រទេសអារ៉ាប៊ីសាអូឌីតក្នុងពេលឆាប់ៗនេះ ដើម្បីពិភាក្សាអំពីសំណើសន្តិភាពរបស់ទីក្រុងKyiv។
ប្រធានការិយាល័យប្រធានាធិបតីអ៊ុយក្រែនលោក Andriy Yermak បានប្រកាសតាមរយៈប្រព័ន្ធផ្សព្វផ្សាយសង្គមកាលពីថ្ងៃពុធថា ការរៀបចំកំពុងដំណើរការសម្រាប់កិច្ចប្រជុំរបស់ទីប្រឹក្សាសន្តិសុខជាតិ។
លោកបាននិយាយថា ក្រុមមន្ត្រីនឹងពិភាក្សាអំពីរូបមន្តសន្តិភាព 10 ចំណុចរបស់ប្រធានាធិបតីអ៊ុយក្រែន Volodymyr Zelenskyy។សំណើនេះរួមមានការដកទ័ពរុស្ស៊ីចេញពីអ៊ុយក្រែនផងដែរ។
លោក Yermak និយាយថា សន្តិភាពត្រឹមត្រូវត្រូវតែត្រូវបានបង្កើតឡើងដោយផ្អែកលើធម្មនុញ្ញអង្គការសហប្រជាជាតិ និងតាមលក្ខខណ្ឌរបស់អ៊ុយក្រែន។
ប្រភពការទូតនិយាយថា ការចរចានឹងត្រូវធ្វើនៅទីក្រុង Jeddah ភាគខាងលិចប្រទេសអារ៉ាប៊ីសាអូឌីត នៅថ្ងៃសៅរ៍ និងថ្ងៃអាទិត្យ។កិច្ចប្រជុំនេះនឹងក្លាយជាកិច្ចប្រជុំលើកទីពីរបន្ទាប់ពីកិច្ចពិភាក្សាស្រដៀងគ្នានេះនៅប្រទេសដាណឺម៉ាកក្នុងខែមិថុនា។
មន្ត្រីសន្តិសុខមកពីប្រទេស G7 ក៏ដូចជាប្រទេសកំពុងរីកចម្រើន និងកំពុងអភិវឌ្ឍន៍ដែលប្រមូលផ្តុំគ្នា រួមទាំងឥណ្ឌា ប្រេស៊ីល និងទួរគី បានចូលរួមកិច្ចប្រជុំលើកដំបូង។
លោកYermak និយាយថា មន្ត្រីអ៊ុយក្រែនក៏កំពុងទាក់ទងជាមួយឯកអគ្គរដ្ឋទូតដែលឈរជើងនៅអ៊ុយក្រែនផងដែរ។លោកនិយាយថា ប្រទេសរបស់លោកមានបំណងបើកកិច្ចប្រជុំកំពូលជាមួយមេដឹកនាំពិភពលោក ដើម្បីអនុវត្តសំណើសន្តិភាពរបស់ខ្លួន៕
