អន្តរជាតិ៖រដ្ឋបាលបណ្តោះអាសន្នរបស់តាលីបង់ក្នុងប្រទេសអាហ្វហ្គានីស្ថានបាននិយាយកាលពីថ្ងៃពុធថាខ្លួនបានជួបពិភាក្សាជាមួយប្រទេសជាច្រើនរួមទាំងសហរដ្ឋអាមេរិក និងចក្រភពអង់គ្លេសលើប្រធានបទជាច្រើននៅក្នុងប្រទេសកាតា។
រដ្ឋមន្ត្រីការបរទេសស្តីទី Mawlawi Amir Khan Muttaqi កំពុងដឹកនាំគណៈប្រតិភូនៅរដ្ឋធានីDoha ជួបជាមួយតំណាងមកពីសហរដ្ឋអាមេរិក ចក្រភពអង់គ្លេស ហូឡង់ អេស្បាញ កូរ៉េខាងត្បូង អ៊ីតាលី អូស្ត្រាលី និងកាណាដា,នេះបើតាមមន្ត្រីក្រសួងការបរទេសបណ្ដោះអាសន្ន។
នៅក្នុងសារបង្ហោះនៅលើបណ្ដាញសង្គម X ដែលពីមុនត្រូវបានគេស្គាល់ថាជាTwitter អ្នកនាំពាក្យរងរបស់ក្រសួងលោក Hafiz Zia Ahmad បាននិយាយថា៖ “ការពិភាក្សាលម្អិតគ្រប់ជ្រុងជ្រោយត្រូវបានធ្វើឡើងលើវឌ្ឍនភាពថ្មីៗរបស់IEA (Islamic Emirates of Afghanistan) ដែលបានធ្វើឡើងនៅក្នុងនយោបាយ សេដ្ឋកិច្ច សន្តិសុខ ការគ្រប់គ្រង និងប្រឆាំងគ្រឿងញៀន”។
មន្ត្រីបណ្តោះអាសន្នរបស់ប្រទេសអាហ្វហ្គានីស្ថានមកពីអង្គការរតនាគារ និងអឌ្ឍចន្ទក្រហមរបស់ប្រទេសក៏បានធ្វើបទបង្ហាញអំពីការងាររបស់ពួកគេផងដែរ។
លោក Muttaqi និងគណៈប្រតិភូរបស់លោក Ahmed បាននិយាយថា “ពួកគេបានផ្តល់ចម្លើយយ៉ាងលម្អិតចំពោះសំណួរ និងកង្វល់ដែលលើកឡើងដោយឯកអគ្គរដ្ឋទូតនៃប្រទេសផ្សេងៗ”។
ទីក្រុងDohaក៏បានធ្វើជាម្ចាស់ផ្ទះនៃកិច្ចចរចារយៈពេលពីរថ្ងៃនៅចុងសប្តាហ៍រវាងមន្ត្រីអាហ្វហ្គានីស្ថាន និងគណៈប្រតិភូអាមេរិកដែលមានសមាជិក15 រូប ដែលដឹកនាំដោយតំណាងពិសេសរបស់វ៉ាស៊ីនតោនសម្រាប់អាហ្វហ្គានីស្ថានគឺលោក Thomas West ។
ចាប់តាំងពីពួកគេឡើងកាន់អំណាចក្នុងខែសីហា ឆ្នាំ 2021 ក្រុមតាលីបង់ដែលរដ្ឋាភិបាលរបស់ពួកគេមិនទាន់ត្រូវបានទទួលស្គាល់ជាអន្តរជាតិនោះ បាននឹងកំពុងជួបប្រជុំជាមួយបេសកជនមកពីប្រទេសផ្សេងៗក្នុងប្រទេសកាតា ជាកន្លែងដែលខ្លួនបានរក្សាការិយាល័យនយោបាយរបស់ខ្លួនតាំងពីឆ្នាំ2013មកម្លេះ។
លោកMuttaqi ក៏បានជួបជាមួយលោក Mutlaq Al-Qahtani តំណាងពិសេសរបស់ប្រទេសកាតាសម្រាប់អាហ្វហ្គានីស្ថាននៅក្រសួងការបរទេសផងដែរ។
លោក Ahmad បាននិយាយថា ភាគីទាំងពីរបានពិភាក្សាគ្នាលើបញ្ហានយោបាយ សេដ្ឋកិច្ច និងពាណិជ្ជកម្មផ្សេងៗ ដោយបន្ថែមថាលោក Qahtani បានមើលឃើញ ស្ថានភាពបច្ចុប្បន្ននៅអាហ្វហ្គានីស្ថានគឺមានភាព “ល្អប្រសើរ” ។
លោក Qahtani បាននិយាយថា តំបន់ និងពិភពលោក “គួរតែបោះជំហានឆ្ពោះទៅមុខ ឆ្ពោះទៅរកការចូលរួមក្នុងន័យស្ថាបនា ជាមួយអាហ្វហ្គានីស្ថាន” និងមិនខ្ជះខ្ជាយឱកាសដែលមានស្រាប់,នេះបើយោងតាមក្រសួងការបរទេសអាហ្វហ្គានីស្ថាន៕
