កំពង់ចាម: បេីចាប់គិតត្រឹមព្រឹកថ្ងៃទី៦ ខែសីហា ឆ្នាំ២០២៣នេះ ទឹកទន្លេមេគង្គ ក្នុងភូមិសាស្ត្រ ខេត្តកំពង់ចាម បានហក់ឡើងមានកម្ពស់ ១២.០៨ម៉ែត្រ បេីប្រៀបធៀបនឹងថ្ងៃម្សិលមិញគឺទឹកឡើង ០.១៤ម៉ែត្រ ដែលទាបជាងកំរិតប្រកាសការប្រុងប្រយ័ត្ន ១៥.២០ម៉ែត្រ ដោយឡែកថ្ងៃដូចគ្នានេះក្នុងឆ្នាំ២០២២កន្លងទៅគឺទឹកមានកម្ពស់ត្រឹមតែ ៨.០២ម៉ែត្រប៉ុណ្ណោះ នេះបើតាម ការបញ្ជាក់ របស់ លោក អ៊ុម វិបុល ប្រធានមន្ទីរធនធានទឹក និងឧតុនិយមខេត្តកំពង់ចាម ។
សូមជម្រាបថា មកដល់ពីពេលនេះ បងប្អូនប្រជាកសិករ ដែលរស់នៅស្រុកកោះសូទិន កំពុងតែបង្ខំចិត្តប្រញាប់ប្រញាល់ប្រមូលផលដំណាំមុនកាលកំណត់ ដើម្បី យកធ្វើជាចំណីសត្វ ។ ជាមួយគ្នានោះដែរ ផ្លូវបេតុង ១ខ្សែ តភ្ជាប់ពីភូមិ៨ ភូមិ៩ ភូមិ១២ នៃស្រុកកោះសូទិន ត្រូវបានទឹកលិច មិនអាចធ្វើដំណើរបាននោះទេ ។ មកដល់ពេលនេះ អាជ្ញាធរបានរៀបចំនូវទូកដ សម្រាប់ឆ្លងជំនួសវិញ ដើម្បី សំរួលដល់ការធ្វើដំណើររបស់ប្រជាពលរដ្ឋ បានធ្វើដំណើរតាម កង់ ម៉ូតូ និងអ្នកថ្មើជើងប៉ុណ្ណោះ ។ ចំពោះ រថយន្តធន់តូច មធ្យម និងធនធំ មិនអាចឆ្លងបានទេ តែត្រូវធ្វើដំណើរតាមផ្លូវវាង នៅកន្លែងផ្សេងវិញ ។ ដោយឡែក ផ្លូវបេតុង ១ខ្សែ ដែលតភ្ជាប់ពី ឃុំកោះសំរោង ស្រុកកំពង់សៀម ទៅកាន់ឃុំជីរោទិ៍ ស្រុកត្បូងឃ្មុំ ត្រូវបានទឹកហូរកាត់ផ្តាច់ ។ ចំណែកឯ សាឡាង ដែលបងប្អូនប្រជាពលរដ្ឋតែងតែឆ្លង ត្រូវបានបង្វែរទិសដៅទៅខាង ឃុំកៀនជ្រៃ ដើម្បី ឆ្លងទៅកាន់ឃុំកោះសំរោងវិញ ។
ជាមួយគ្នានោះដែរ យើងក៏សង្កេតឃើញដែរថា បងប្អូនប្រជាពលរដ្ឋ រស់នៅជាប់បណ្តោយដងទន្លេមេគង្គ ក្នុងស្រុកកំពង់សៀម ដែលដាំដុះនូវដំណាំដូចជាពោតក្រហម ល្ង ជាដើម ក៏កំពុងមមាញឹកក្នុងការប្រមូលផល ដើម្បី កុំឲ្យមានផលប៉ះពាល់កាន់តែធ្ងន់ធ្ងរជាងនេះ ៕
