ចិនអនុញ្ញាត្ដិឱ្យបង្កងប៉ាក អន្ទង់ ត្រីដំរី និងខ្យងកម្ពុជាទៅទីផ្សារទបស់ខ្លួន

ចិនអនុញ្ញាត្ដិឱ្យបង្កងប៉ាក អន្ទង់ ត្រីដំរី និងខ្យងកម្ពុជាទៅទីផ្សារទបស់ខ្លួន
អត្ថបទ៖ជួន បូណា និងរូបភាព
ភ្នំពេញ៖ចិនអនុញ្ញាត្ដិឱ្យបង្កងប៉ាក អន្ទង់ ត្រីដំរី និងខ្យងកម្ពុជាទៅទីផ្សារទបស់ខ្លួន ដើម្បីបំពេញតម្រូវការតម្រូវហូបចុកប្រជាជន។
យោងតាមការផ្សព្វផ្សាយលើ Facebook ផ្លូវការរបស់ស្ថានទូតចិនប្រចាំនៅកម្ពុជា នៅយប់ថ្ងៃទី៧ ខែសីហា ឆ្នាំ២០២៣នេះថា រដ្ឋបាលគយនៃប្រទេសចិន ទើបបានបញ្ចប់នីតិវិធី ក្នុងការអនុញ្ញាតឱ្យផលិតផលជលផលរបស់កម្ពុជា ៤មុខទៀត អាចនាំចេញដោយផ្ទាល់ទៅកាន់ប្រទេសចិនបាន រួមមាន៖ បង្កងប៉ាក អន្ទង់ ត្រីដំរី និងខ្យងជាដើម។

ស្ថានទូតចិនប្រចាំកម្ពុជា បញ្ជាក់ថា ផ្អែកលើពាណិជ្ជកម្មប្រពៃណី ដែលមានស្រាប់លើជលផលរវាងចិន និងកម្ពុជា រួមមានបង្កងប៉ាក អន្ទង់ ត្រីដំរី និងខ្យង សម្រេចបាននូវជលផលទាំងស្រុង ដែលត្រូវបានអនុញ្ញាតនាំចេញទៅកាន់ប្រទេសចិន។សម្រាប់ក្រុមហ៊ុនដែលត្រូវបានរដ្ឋបាលគយនៃប្រទេសចិន ទទួលស្គាល់សម្រាប់ការនាំចេញផលិតផលជលផលទាំងនេះគឺ ក្រុមហ៊ុន Cambodian Tienit International Trading។ ការអនុញ្ញាតនេះ ជាសមិទ្ធផលដ៏សំខាន់ក្នុងការនាំចេញកសិផលកម្ពុជា ទៅកាន់ទីផ្សារប្រទេសចិន។

សូមបញ្ជាក់ថា កាលពីខែឧសភា ឆ្នាំ២០២៣ ផលិតផលជលផលធម្មជាតិរបស់កម្ពុជាចំនួន ១១ប្រភេទ ទទួលបានការអនុញ្ញាតឲ្យនាំចេញ ទៅកាន់ទីផ្សារប្រទេសចិន។ ផលិផលចំនួន ១១ប្រភេទនេះរួមមាន៖ កំពឹសទឹកសាប, ត្រីប្រាធំ, ត្រីប្រាខ្ចៅ, ខ្យងទឹកសាបពីរប្រភេទ, អន្ទង់ទឹកសាប, បង្កងកណ្តូបពីរប្រភេទ, បង្គាខ្លឹង, បង្គាស, និងបង្គាប៉ារ៉ា។
អគ្គរដ្ឋបាលគយចិន បានអនុម័តលើការចុះបញ្ជី របស់ក្រុមហ៊ុននាំចេញមានឈ្មោះ KIM CHOU Co., Ltd Import Export and International Transportation ដែលបានស្នើសុំនាំចេញផលផលិតផលជលផលពីធម្មជាតិចំនួន ១១ប្រភេទទៅកាន់ប្រទេសចិន។
គួរជម្រាបថា រហូតមកដល់ពេលនេះ ផលិតផលកសិកម្មរបស់កម្ពុជា ដែលអាចនាំចេញប្រទេសចិន រួមមាន៖ អង្ករ ដំឡូងមីក្រៀម គ្រាប់ស្វាយចន្ទី ចេក ផ្លែស្វាយ ពោត ផ្លែមៀនប៉ៃលិន (តាង៉ែន) ត្រីប្រា ម្រេច ផលិតផលជលផលពីធម្មជាតិចំនួន ១១ប្រភេទ និងផលិតផលជលផលចិញ្ចឹម ៤មុខទៀត៕