លោក ឡុង គន្ធា ពលករនៅជប៉ុនក្លាយជាម្ចាស់ចម្ការមើមឈូកដំបូងគេនៅកម្ពុជា
ម៉ឹងកុសល (០៨.០៨.២០២៣)
លោក ឡុង គន្ធា ពលករនៅជប៉ុន ក្លាយជាម្ចាស់ចម្ការមើមឈូក ដំបូងគេនៅកម្ពុជា ខណៈដំណាំមើមឈូកនេះកំពុងមានទីផ្សារល្អ និង ជាពិសេសមានអត្ថប្រយោជន៍ ជាច្រើនសម្រាប់សុខភាពរាងកាយមនុស្ស។ លោក ឡុង គន្ធា ម្ចាស់ចម្ការដាំមើមឈូកមួយកន្លែងស្ថិតនៅខេត្តព្រៃវែងបានប្រាប់វិទ្យុជាតិកម្ពុជាឲ្យដឹងថា លោកជាអតីតពលករដែលបំរើការងារនៅប្រទេសជប៉ុន ដែលចំណាយអស់រយៈពេល៩ឆ្នាំ ក្នុងការធ្វើកសិកម្មផ្នែកដាំដុះមើមឈូក ។ លោកបានបន្តថាដំណាំមើមឈូក
ជាដំណាំមួយប្រភេទដែលមានសក្ដានុពលនៅតាមបណ្ដាលប្រទេសមួយចំនួនដូចជាប្រទេសជប៉ុន ចិន កូរ៉េជាដើម ដោយឡែកនៅក្នុងពេលបច្ចុប្បន្ននេះ ដំណាំមើមឈូកក៏មានដាំនៅក្នុងប្រទេសកម្ពុជាផងដែល។ លោកបានបន្ថែមថា សម្រាប់មើមឈូកដែលលោកកំពុងដាំគឺជាពូជមើមឈូករបស់ប្រទេសជប៉ុន ដែលមានទម្ងន់ក្នុង១មើមជិតមួយគីឡូក្រាម និងមិនមានប្រើប្រាស់ជីគីមីអ្វីទេដែលមិនធ្វើឲ្យប៉ះពាល់ទៅដល់សុខភាពអ្នកបរិភោគឡើយ។លោក ឡុង គន្ធាបញ្ជាក់
បន្ថែមថា ដោយសារតែមើលឃើញពីកត្តាជាច្រើនផ្នែកកសិកម្មក្នុងស្រុកទាក់ទងពីដំណាំ ដែលមានសក្ដានុពល ដែលប្រជាពលរដ្ឋមានការពេញនិយមក្នុងការទទួលទាន ជាច្រើនប្រភេទ មិនថាជាតម្លៃ ឬក៏អត្ថប្រយោជន៏ជាច្រើនមុខផ្សេងទៀតទៅដល់សុខភាព។
សូមបញ្ជាក់ថា លោក ឡុង គន្ធាម្ចាស់កសិដ្ឋានខេធីដាំមើមឈូក ស្ថិតនៅ ឃុំព្រៃចំការ ស្រុកកំចាយមារ ខេត្តព្រៃវែង បានបង្កើតនៅក្នុងឆ្នាំ២០២១ លើផ្ទៃដី២ហិកតាដែលមានតម្លៃក្នុង១គីឡូក្រាម១០០០០រៀល៕
