អន្តរជាតិ៖ក្នុងអំឡុងពេលជួបជាមួយប្រធានាធិបតីតៃវ៉ាន់ Tsai Ing-wen លោក Aso Taro អនុប្រធានគណបក្សប្រជាធិបតេយ្យសេរីដែលកំពុងកាន់អំណាច របស់ប្រទេសជប៉ុនបានសម្តែងនូវឆន្ទៈក្នុងការពង្រឹងទំនាក់ទំនងទ្វេភាគីបន្ថែមទៀត។
លោកAso ដែលជាអតីតនាយករដ្ឋមន្ត្រីជប៉ុនបានជួបលោកស្រី Tsai នៅការិយាល័យប្រធានាធិបតីតៃវ៉ាន់កាលពីរសៀលថ្ងៃអង្គារ។
លោកស្រីTsai បានពណ៌នាប្រទេសជប៉ុនថាជាដៃគូដ៏សំខាន់របស់តៃវ៉ាន់ ហើយបានបង្ហាញពីឆន្ទៈរបស់លោកស្រីក្នុងការសហការលើការពង្រឹងខ្សែសង្វាក់ផ្គត់ផ្គង់ និងផ្នែកផ្សេងទៀតដែលមានផលប្រយោជន៍ទៅវិញទៅមក។
ជាការឆ្លើយតបលោកAso បាននិយាយថាទោះបីបន្ទាប់ពីទំនាក់ទំនងការទូតរវាងជប៉ុន និងតៃវ៉ាន់ត្រូវបានកាត់ផ្តាច់ក៏ដោយ ក៏នៅតែមានមនោសញ្ចេតនានៅក្នុងគណបក្ស LDP ដែលតស៊ូមតិដើម្បីរក្សាទំនាក់ទំនងរឹងមាំជាមួយតៃវ៉ាន់។
លោកAso បានបង្ហាញក្ដីសង្ឃឹមរបស់គាត់ថាទំនាក់ទំនងជប៉ុន-តៃវ៉ាន់នឹងត្រូវបានកំណត់លក្ខណៈដោយការគាំទ្រគ្នាទៅវិញទៅមកក្នុងពេលវេលាដ៏លំបាក និងចូលរួមជាមួយគ្នានៅក្នុងគ្រានៃសុភមង្គល។
មន្ត្រីទាំងពីរក៏ត្រូវបានគេរាយការណ៍ផងដែរថាបានពិភាក្សាអំពីរបៀបជម្លៀសជនជាតិជប៉ុនក្នុងករណីមានវិបត្តិដែលអាចកើតមានពាក់ព័ន្ធនឹងតៃវ៉ាន់។
សូមជ្រាបថាមុនពេលកិច្ចប្រជុំនេះ លោក Aso បានជួបជាមួយអនុប្រធានាធិបតីតៃវ៉ាន់ លោក Lai Ching-te ដែលជាបេក្ខភាពផ្លូវការរបស់គណបក្សប្រជាធិបតេយ្យដែលកំពុងកាន់អំណាចសម្រាប់ការបោះឆ្នោតប្រធានាធិបតីនៅក្នុងខែមករាខាងមុខនេះ។
លោក Lai បានសង្កត់ធ្ងន់លើសារៈសំខាន់នៃទំនាក់ទំនងដ៏រឹងមាំជាមួយទាំងប្រទេសជប៉ុន និងសហរដ្ឋអាមេរិក។
ខណៈលោក Aso បានគូសបញ្ជាក់អំពីសារៈសំខាន់នៃសន្តិភាព និងស្ថិរភាពនៅទូទាំងច្រកសមុទ្រតៃវ៉ាន់ ដោយនិយាយថា លោកមានការព្រួយបារម្ភយ៉ាងខ្លាំងចំពោះភាពតានតឹងដែលកំពុងកើតឡើងនៅក្នុងច្រកសមុទ្រដែលបង្ករឡើងដោយក្រុងប៉េកាំង៕
