រថយន្ដក្រុង ១៥កៅអី បន្លំភ្នែកសមត្ថកិច្ចដឹកឈើមូលក្រណាត់ ប្រភេទឈ្លីក ២០ដុំ ត្រូវ អស់លក្ខណ៍ជាប់អន្ទាក់ផ្នែករដ្ឋបាលព្រៃឈើរវៀង

ព្រះវិហារ៖ កាលពីរសៀលថ្ងៃទី ២២ ខែឧសភា ឆ្នាំ២០២៤ វេលាម៉ោង០៥:៣០នាទីលោក ស៊ុ ស៊ីវុត្ថា នាយផ្នែករវៀង ដឹកនាំមន្ត្រីផ្នែក និងសង្កាត់ ចុះបង្ក្រាបរថយន្ដដឹកឈើមូល ប្រភេទឈ្លីក ដែល បន្លំបំភាន់ភ្នែកសមត្ថកិច្ចកន្លងមក ថិតក្នុងភូមិភ្នំដែក ឃុំរមណីយ ស្រុករវៀង ខេត្តព្រះវិហារ។

លោក ស៊ុ ស៊ីវុត្ថា នាយផ្នែករដ្ឋបាលព្រៃឈើរវៀងបានឲដឹងថា៖ ការងារបង្រ្កាបបទល្មើសដឹកឈើ ត្រូវបានផ្នែករដ្ឋបាលព្រៃឈើរវៀង បានឃាត់ចាប់រថយន្ត១គ្រឿង ពណ៌ទឹកដោះគោ ពាក់ស្លាកលេខភ្នំពេញ3E- 4995 ពីបទដឹកជញ្ជូនផល អនុផលព្រៃឈើដោយគ្មានលិខិតអនុញ្ញាតពីរដ្ឋបាលព្រៃឈើនូវឈើមូលប្រភេទលេខ១(ឈ្លីក)ចំនួន២០កំណាត់ ប្រព្រឹត្តឡើងដោយ ជនល្មើសឈ្មោះ ធាន អួយ ភេទប្រុស អាយុ២២ឆ្នាំ ទីលំនៅបច្ចុប្បន្នភូមិអូរពោធិ ឃុំរមណីយ ស្រុករវៀង ខេត្តព្រះវិហារ។
បច្ចុប្បន្នវត្ថុទាំងអស់ខាងលើរក្សាទុកនៅទីស្នាក់ការផ្នែករវៀង ដើម្បីរង់ចាំចងក្រងសំណុំរឿងតាមនីតិវិធីនៃច្បាប់ស្តីពីព្រៃឈើបញ្ជូនទៅសមត្ថកិច្ចថ្នាក់លើពិនិត្យ សម្រេច។

លោកបានបន្តទៀតថា៖ រថយន្ដខាងលើមុនពេលបង្ក្រាប់ លោកបានតាមដាន ស្រាវជ្រាវ រហុតឈានដល់ដេញ ចុះបង្ក្រាប់ បាននៅទីតាំងខាងលើ។ ហើយរថយន្ដដឹកឈើខាងលើនេះដែរ បានប្រមូលពីក្រាំងដូង ដឹកតាមផ្លូវជាតិលេខ៦២ យកមកទំលាក់នៅម្ដុំ ទ្រីភាព អាជ្រៀកកែច្នៃ ដឹកចេញបន្ត ៕