អេស្ប៉ាញ ប៉ះបារាំង ប្រជែងមេដាយមាសនៅអូឡាំពិកទីក្រុងបារីស២០២៤

ប្រភេទកីឡាបាល់ទាត់ផ្នែកបុរសនៅ Paris Olympic Games 2024 បានឈានមកដល់វគ្គផ្តាច់ព្រ័ត្រហើយ ដោយក្រុម U23 អេស្ប៉ាញ ត្រូវប៉ះម្ចាស់ផ្ទះបារាំង ដណ្តើមយកមេដាយមាស។

កីឡាករ Jean-Philippe Mateta ដែលត្រូវបានជ្រើសរើសចេញពីក្លិបអង់គ្លេស Crystal Palace រកបាន ២គ្រាប់ម្នាក់ឯង ក្នុងជ័យជម្នះ ៣-១ ក្នុងម៉ោងថែម ១៥នាទី ២ដងទៅលើគូប្រជែងអេហ្ស៊ីប ដែលស្ថិតក្រោមការបង្វឹករបស់លោក Thierry Henry ដើម្បីប្រជែងមេដាយមាសលើកដំបូងផងដែរ ក្នុងរយៈពេល ៤០ឆ្នាំក្នុងយុទ្ធនាការអូឡាំពិករដូវក្តៅ។

ដោយឡែក អេស្ប៉ាញវិញ ក៏បានធ្វើការវាយបកឈ្នះម៉ារ៉ុក ២-១ ពីក្នុងវគ្គពាក់កណ្តាលផ្តាច់ព្រ័ត្រនាយប់មិញនេះដូចគ្នា ដើម្បីឡើងទៅជួបបារាំង ដែលជាគូប្រជែងចាស់ក្រុមឈុតធំ ទើបបានយកឈ្នះកាលនៅ Euro 2024 នាខែមុន។

អតីតម្ចាស់មេដាយប្រាក់កាលអូឡាំពិក Tokyo 2020 អេស្ប៉ាញបានភ្លាត់ស្នៀតឱ្យក្រុមមកពីទ្វីបអាហ្រ្វិក ម៉ារ៉ុកបើកការនាំមុខ ១គ្រាប់មុននៅវគ្គទី១ ពីការធ្វើបានដោយកីឡាករ Soufiane Rahimi ដែលជាគ្រាប់ទី៦ និងច្រើនជាងគេផងដែរនៅអូឡាំពិកលើកនេះ មុនពេល Fermin Lopez និង Juanlu Sanchez សហការគ្នារកបានម្នាក់ ១គ្រាប់មកវិញ ជួយអេស្ប៉ាញឡើងផ្តាច់ព្រ័ត្រតែម្តងដោយប៉ះបារាំង ប្រកួតនៅថ្ងៃសុក្រសប្ដាហ៍នេះ៕