បន្ទាយមានជ័យ៖ បន្ទាប់ពីជំនន់ទឹកភ្លៀងបានជន់លិច ហើយត្រូវបានស្រកទៅវិញ មិនទាន់បានប៉ុន្មានថ្ងៃផង ជំនន់ទឹកភ្លៀង ក៏ហូរធ្លាក់ពីប្រទេសថៃមកម្តងទៀត និងបានជន់លិចតំបន់មួយចំនួននៃក្រុងប៉ោយប៉ែត ដែលនេះជាលើកទី២ហើយ។ ជំនន់នេះ បានចាប់ផ្តើមនៅយប់ឈានចូលថ្ងៃទី២០ ខែតុលា ឆ្នាំ២០២១។ ក្នុងស្ថានភាពនេះ យ៉ាងហោចណាស់មានប្រជាពលរដ្ឋក្នុងភូមិចំនួន ៤ នៃក្រុងប៉ោយប៉ែត ត្រូវបានជន់លិច ដែលទឹកបានហូរធ្លាក់ពីប្រទេសថៃ តាមអូរព្រំដែនកម្ពុជា-ថៃ។ នេះបើយោងតាមរបាយការណ៍របស់អាជ្ញាក្រុងប៉ោយប៉ែត។
លោក គាត ហ៊ុល អភិបាលក្រុងប៉ោយប៉ែត និងជាប្រធាននៃគណៈបញ្ជាការឯកភាពក្រុង បានដឹកនាំកម្លាំងចម្រុះប្រមាណជាង ៣០០នាក់ ធ្វើសកម្មភាពចុះតាមអូរព្រំដែនកម្ពុជា-ថៃ នៅថ្ងៃទី២០ ខែតុលា ឆ្នាំ២០២១ ដើម្បីត្រៀមលក្ខណៈជួយជម្លៀសប្រជាពលរដ្ឋ។ ទន្ទឹមនឹងនេះ អាជ្ញាធរបានជួយសង្គ្រោះប្រជាពលរដ្ឋជាបណ្ដើរៗ ដើម្បីរួចផុតពីទឹកជំនន់ដែលកំពុងតែបន្តឡើង និងលិចលង់ផ្ទះសម្បែង ទ្រព្យសម្បត្តិរបស់ពលរដ្ឋនាពេលនេះ។
លោក គាត ហ៊ុល អភិបាលក្រុងប៉ោយប៉ែត បានឱ្យដឹងថា ទឹកជំនន់ដែលកំពុងតែលិចលង់នៅក្នុងក្រុងប៉ោយប៉ែតនេះ នៅមានស្ថានភាពតិចតួចនៅឡើយទេ បើធៀបនឹងឆ្នាំមុន ទឹកសម្រុកឡើងមកខ្លាំងធ្វើឱ្យអាជ្ញាធរជួយសង្គ្រោះស្ទើរតែមិនទាន់ តែពេលនេះប្រជាពលរដ្ឋដែលកំពុងរងគ្រោះតាមអូរព្រំដែនមានសភាពដូចជាធម្មតានៅឡើយទេ ដែលអាចឱ្យកម្លាំងជួយពួកគាត់បានទាន់ពេលវេលា។ មកដល់ពេលនេះអាជ្ញាធរបានជួយពួកគាត់បានជាង ៨០គ្រួសារហើយ តែកំពុងតែត្រៀមមើលបន្ត ប្របើសិនទឹកឡើងមកខ្លាំងដូចឆ្នាំមុន នឹងជួយពួកគាត់មកទីទូលសុវត្ថិភាពជាបន្ទាន់ ដោយមិនបង្អង់យូរឡើង៕
