តម្លៃផ្ទះថ្មីរបស់ប្រទេសចិនបានជាប់គាំងជាលើកដំបូងមិនធ្លាប់មាន ចាប់តាំងពីខែកុម្ភៈ ឆ្នាំ២០២០។ តម្លៃផ្ទះថ្មីជាមធ្យមនៅក្នុងទីក្រុងធំៗរបស់ចិនចំនួន ៧០ មិនមានការផ្លាស់ប្តូរឡើយក្នុងខែកញ្ញា បើធៀបនឹងកំណើន ០,២% នៅក្នុងខែសីហា។ នេះបើយោងតាមទិន្នន័យ ដែលចេញដោយការិយាល័យស្ថិតិជាតិ (NBS) កាលពីថ្ងៃពុធ។
អ្នកវិភាគខ្លះបាននិយាយថា តម្លៃបានធ្លាក់ចុះ ០.០៨% ហើយខ្លះទៀតថាធ្លាក់ចុះ ០.១% ដោយផ្អែកលើការគណនារៀងៗខ្លួន ដែលអាចប្រែប្រួលបន្តិចបន្តួចតាមរូបមន្ដ ប៉ុន្ដែការិយាល័យស្ថិតិជាតិ (NBS) ពុំបានចេញមុខបំភ្លឺឡើយ។
ទិន្នន័យបានបង្ហាញថា ទីក្រុងចំនួន ២៧ បានរាយការណ៍ពីការកើនឡើងពីមួយខែទៅមួយខែ ដែលធៀបនឹងទីក្រុងចំនួន ៤៦ ក្នុងខែសីហា ដែលជាកម្រិតទាបបំផុត ចាប់តាំងពីខែកុម្ភៈ ឆ្នាំ២០២០ នៅពេលដែលចិនរងការវាយប្រហារដោយជំងឺកូវីដ-១៩។
នៅខែកញ្ញា ទីក្រុងមួយចំនួនបានបង្កើនយុទ្ធនាការរបស់ពួកគេ ដើម្បីទប់ស្កាត់សកម្មភាពមិនប្រក្រតីលើទីផ្សារអចលនទ្រព្យ។ តួយ៉ាង ទីក្រុង Xiamen បានរឹតបន្តឹងបន្ថែមពីលើវិធានការដែលមានស្រាប់ ដោយហាមឃាត់មិនឱ្យអ្នកទិញផ្ទះជាលើកដំបូងលក់ផ្ទះរបស់ពួកគេចេញក្នុងរយៈពេល៥ឆ្នាំ។
លោក Zhang Dawei ប្រធានអ្នកវិភាគប្រចាំទីភ្នាក់ងារអចលនទ្រព្យ Centaline បានមានប្រសាសន៍ថា៖ “ការរឹតបន្តឹងឥណទានអចលនទ្រព្យជាមួយនឹងប្រាក់កម្ចីទិញផ្ទះធ្លាក់ចុះ ៥១០ ពាន់លានយន់ (៧៩,៨ ពាន់លានដុល្លារ) ពីមួយឆ្នាំទៅមួយឆ្នាំនៅក្នុងត្រីមាសទី៣ គឺជាហេតុផលធំបំផុតដែលធ្វើឱ្យទីផ្សារទាំងមូលជាប់គាំង”៕
