ជនសង្ស័យម្នាក់ធ្វើសកម្មភាពឆក់ការបូបពីស្រ្តីម្នាក់រួចត្រូវបានកម្លាំងនគរបាលព្រហ្មទណ្ឌក្រសួងឃាត់ខ្លួនបាន

អត្ថបទ និង រូបភាព ទឹម រតនា

ភ្នំពេញ៖ ជនសង្ស័យម្នាក់បន្ទាប់ពីធ្វើសកម្មភាពឆក់ការបូប ពីស្រ្តីម្នាក់កំពុងធ្វើដំណើរតាមដងផ្លូវ បានសម្រេចត្រូវកម្លាំងនគរបាលជំនាញព្រហ្មទណ្ឌក្រសួងមហាផ្ទៃកំពុងល្បាត ឃើញឆក់ជាក់ស្ដែង ដេញប្រផាប់ប្រផីង ភ្លាមៗតែម្ដងរហូតឃាត់ខ្លួនបានសម្រេច។

ហេតុការណ៍ឃាត់ខ្លួនជនសង្ស័យបានធ្វើឡើងនៅវេលាម៉ោង១និង៣០នាទីរសៀលថ្ងៃទី២០ ខែតុលា ឆ្នាំ២០២១ នៅចំណុចផ្លូវរថភ្លើង ម្ដុំសង្កាត់ទួលសង្កែទី១ ខណ្ឌឬស្សីកែវ និងបានធ្វើសកម្មភាពឆក់នៅចំណុចផ្លូវ១៩៨៦ មូលដ្ឋានសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។

ជនសង្ស័យមានឈ្មោះ សុវណ្ណ វីរះ ភេទប្រុស អាយុ២១ឆ្នាំ មុខរបរមិនពិតប្រាកដ ស្នាក់នៅផ្ទះជួល ផ្លូវលំ ម្ដុំសង្កាត់ បឹងកក់ទី១ ខណ្ឌទួលគោក រាជធានីភ្នំពេញ។

តាមប្រភពព័ត៌មានពីនគរបាលជំនាញបានឲ្យដឹងថា ដោយមានបទបញ្ជាពីថ្នាក់ដឹកនាំឲ្យចុះជួយល្បាតតាមមូលដ្ឋាន នៅមុនពេលកើតហេតុ កម្លាំងជំនាញល្បាតរបស់ព្រហ្មទណ្ឌក្រសួងមហាផ្ទៃ បានល្បាតក្នុងមូលដ្ឋានងាយរងគ្រោះស្រាប់តែមាននារីម្នាក់ កំពុងជិះម៉ូតូ ម៉ាក់វីវ៉ា តាមបណ្ដោយផ្លូវលេខ១៩៨៦ ខណៈនោះមានជនសង្ស័យម្នាក់ជិះម៉ូតូ ម៉ាកឃ្លីក ពណ៌ខ្មៅ លាយទឹកក្រូច ពាក់ស្លាកលេខ ភ្នំពេញ1IX-1140 ជិះពីក្រោយនារីរងគ្រោះ បានធ្វើសកម្មភាពឆក់ការបូប បានសម្រេច ភ្លាមៗនោះកម្លាំងកំពុងល្បាតបានឃើញហេតុនោះ ក៏ដេញប្រផាប់ប្រផីង ពីចំណុចកើតហេតុ នៅតាមបណ្ដោយផ្លូវលេខ១៩៨៦ សង្កាត់ភ្នំពេញថ្មី រហូតដល់ផ្លូវរថភ្លើង មូលដ្ឋានសង្កាត់ទួលសង្កែទី១ ទើបឃាត់ខ្លួនសង្ស័យបានសម្រេច។

ក្រោយពេលកើតហេតុកម្លាំងនគរបាលបានឃាត់ខ្លួនជនសង្ស័យរួមទាំងវត្ថុតាងទៅក្រសួងមហាផ្ទៃ ដើម្បីកសាងសំណុំរឿងបញ្ជូនខ្លួនទៅអយ្យការអមសាលាដំបូងរាជធានីភ្នំពេញចាត់ការតាមនីតិវិធី។ចំណែកវត្ថុតាងការបូបនគរបាលបានប្រគល់ជូននារីរងគ្រោះវិញ៕