ផ្ទេរសាំងពីរថយន្តសង្ស័យខុសបច្ចេកទេសឆេះឃ្លាំងស្តុកសាំង និងផ្ទះខូចខាតស្ទើរទាំងស្រុង

ខេត្តបាត់ដំបង ៖ តាមរាយការណ៍បឋមអគ្គិភ័យ មួយបានឆាបឆេះឃ្លាំងស្តុកស៊ីទែនប្រេងសាំង និងរាលឆេះដល់តួរផ្ទះធំម្ចាស់លក់សំណង់យីហោ ម៉ាន់ ចៃ ស្ទើរទាំងស្រុងបង្កការភ្ញាក់ផ្អើលដល់ប្រជាពលរដ្ឋ និង សមត្ថកិច្ច ជំនាញចុះនាំយករថយន្តជាច្រើនគ្រឿងចេញអន្តរាគមន៍បាញ់ទឹកពន្លត់។

ហេតុការណ៍ភ្ញាក់ផ្អើលនៃ អគ្គិភ័យ នេះ បានកើត ឡើងនៅវេលា ម៉ោង ១៦និង ១៥នាទី ថ្ងៃទី ២០ ខែ តុលា ឆ្នាំ ២០២១ នៅ ចំណុច ភូភូមិឈើទាល ឃុំ ឈើទាល ស្រុកបាណន់ ខេត្ត បាត់ដំបង ។

ប្រភពនៅកន្លែងកើតហេតុបានប្រាប់ថា នៅមុនពេលកើតហេតុគេឃើញរថយន្តធុនតូចមួយគ្រឿងដឹកស៊ីទែនសាំងរបស់ក្រុមហ៊ុន TALA បានដឹកសាំងចូលទៅឃ្លាំងខាងក្រោយផ្ទះម្ចាស់លក់គ្រឿងសំណង់យីហោ ម៉ាន់ ចៃ គោលបំណងដើម្បីផ្ទេរសាំងទុក លុះក្រោយមកក៏ស្រាប់តែលឺសំលេងផ្ទុះឡើង និងមានអណ្តាតភ្លើងឆេះមកយ៉ាងសន្ធោសន្ធៅតែម្តង បណ្តាលឆេះស្រោចដល់តៃកុងឡាន ត្រូវបានអ្នកស្រុកជួយអន្តរាគមន៍នាំយកទៅសង្គ្រោះនៅឯមន្ទីរពេទ្យភ្លាមៗ ផងដែរ។

ក្នុងហេតុការណ៍គ្រោះអគ្គិភ័យនេះដែរ គេសង្កេតឃើញសមត្ថកិច្ចនាំយករថយន្តពន្លត់អគ្គិភ័យជាច្រើនគ្រឿងចេញ អន្តរាគមន៍បាញ់ទឹកពន្លត់ទប់ស្កាត់ នូវ ការ រាលដាល ទៅ លើ ផ្ទះ ដទៃ ដែល នៅ ជិតខាង ដែរ ដោយឡែក សម្រាប់ ផ្ទះ ដែល ឆេះ ខាងលើ គឺ ខូចខាត ទាំងរថយន្តដឹកសាំងនិងសម្ភារខាងក្នុងអស់ជាច្រើន និងឆេះរាលដាលដល់តួផ្ទះធំដែលសង់អំពីថ្មកំពស់០៣ជាន់ខូចខាតផ្នែកខាងក្រោយស្ទើរទាំងស្រុងផងដែរ។