របាយការណ៍ស៊ើបអង្កេតដ៏សំខាន់មួយបានបញ្ជាក់ថា លោក Jair Bolsonaro ប្រធានាធិបតីប្រេស៊ីលគួរតែត្រូវបានចោទប្រកាន់ពីបទឧក្រិដ្ឋកម្មជាបន្តបន្ទាប់ ទាក់ទងនឹងការគ្រប់គ្រងជំងឺរាតត្បាត Covid-19 របស់ប្រទេសនេះ។
របាយការណ៍នេះគឺជាការបញ្ចប់ការស៊ើបអង្កេតរយៈពេល ៦ ខែ ដែលបានបង្ហាញពីរឿងអាស្រូវនិងអំពើពុករលួយនៅក្នុងជួររដ្ឋាភិបាល។
លោកប្រធានាធិបតី Bolsonaro ត្រូវបានគេចោទប្រកាន់ពីបទបរាជ័យក្នុងការគ្រប់គ្រងវីរុស ដែលបានសម្លាប់ប្រជាជនប្រេស៊ីលជាង ៦០ ម៉ឺននាក់ និងមានបំណងចង់ឱ្យលោក Bolsonaro ប្រឈមមុខនឹងការចោទប្រកាន់បទព្រហ្មទណ្ឌមួយចំនួន រួមទាំងឧក្រិដ្ឋកម្មប្រឆាំងមនុស្សជាតិ។
ជាការឆ្លើយតប លោកប្រធានាធិបតីបានបញ្ជាក់ថា៖ “យើងដឹងថា យើងគ្មានទោសអ្វីទាំងអស់។ យើងបានធ្វើរឿងត្រឹមត្រូវតាំងពីដំបូង”។
សេចក្តីព្រាងដំបូងនៃរបាយការណ៍នេះបានផ្តល់អនុសាសន៍ថា លោកប្រធានាធិបតីគួរតែត្រូវបានចោទប្រកាន់ពីបទមនុស្សឃាតនិងអំពើប្រល័យពូជសាសន៍ប្រឆាំងនឹងក្រុមជនជាតិដើម ប៉ុន្តែអនុសាសន៍ទាំងនេះត្រូវបានដកចេញពីរបាយការណ៍ចុងក្រោយដែលមានកម្រាស់១.២០០សន្លឹក។
សូមជម្រាបជូនផងដែរថា ក្នុងរយៈពេលប្រាំមួយខែចុងក្រោយនេះ ជនជាតិប្រេស៊ីលបានផ្ដោតការចាប់អារម្មណ៍លើការស៊ើបអង្កេត ដែលបានលាតត្រដាងរឿងអាស្រូវពីមួយទៅមួយ ហើយជាក់ស្ដែង ការបកអាក្រាតនេះបានធ្វើឱ្យខូចប្រជាប្រិយភាពរបស់លោកប្រធានាធិបតី៕
