អន្តរជាតិ៖លោក Suh Wook រដ្ឋមន្ត្រីក្រសួងការពារជាតិកូរ៉េខាងត្បូងបានថ្លែងនៅក្នុងកិច្ចប្រជុំគណៈកម្មាធិការសភាកាលពីថ្ងៃព្រហស្បតិ៍ថាមីស៊ីលផ្លោងដែលបាញ់សាកល្បងចេញពីនាវាមុជទឹកឬ SLBM នាពេលថ្មីៗកន្លងនេះរបស់ទីក្រុងព្យុងយ៉ាង ហាក់ដូចជាស្ថិតនៅក្នុងដំណាក់កាលដំបូងនៃការអភិវឌ្ឍន៍នៅឡើយ។
ប្រទេសកូរ៉េខាងជើងបាននិយាយថាខ្លួនបានបាញ់សាកល្បងដោយជោគជ័យនូវមីស៊ីលប្រភេទ SLBM ចេញពីនាវាមុជទឹកកាលពីថ្ងៃអង្គារ។
យោធាកូរ៉េខាងត្បូងនិយាយថាទីក្រុងព្យុងយ៉ាងបានបាញ់សាកល្បងអ្វីដែលគេចាត់ទុកថាជាមីស៊ីលប្រភេទSLBM ចេញពីដែនទឹកក្បែរទីក្រុងស៊ីនប៉ូភាគខាងកើតប្រទេសកាលពីថ្ងៃអង្គារ។
លោក Suh បាននិយាយថាវាចាំបាច់ដើម្បីវាយតម្លៃមិនត្រឹមតែអំពីមីស៊ីលប៉ុណ្ណោះទេប៉ុន្តែក៏ត្រូវសិក្សាទៅលើវេទិកាបាញ់បង្ហោះដូចជានាវាមុជទឹកផងដែរដើម្បីកំណត់ថាតើការអភិវឌ្ឍន៍SLBM របស់ទីក្រុងព្យុងយ៉ាងមានភាពជឿនលឿនប៉ុណ្ណា។
មន្រ្តីរូបនេះបាននិយាយថាមីស៊ីលនេះអាចជាមីស៊ីលប្រភេទ Mini-SLBM ដែលត្រូវបានដាក់តាំងបង្ហាញនៅក្នុងពិព័រណ៌អាវុធនៅទីក្រុងព្យុងយ៉ាងកាលពីដើមខែនេះ។ លោកបានហៅមីស៊ីលនេះថាជាការគំរាមកំហែងថ្មីប៉ុន្តែបានបន្ថែមថាប្រព័ន្ធការពារអាកាសអាចស្ទាក់ចាប់មីស៊ីលប្រភេទនេះបាន៕
