អន្តរជាតិ៖ទីភ្នាក់ងារអង្គការសហប្រជាជាតិបានបញ្ជាក់នៅថ្ងៃសុក្រនេះថាជនជាតិអាហ្វហ្គានីស្ថានរាប់ពាន់នាក់នៅទូទាំងប្រទេសបានទទួលជំនួយមនុស្សធម៌ក្នុងរយៈពេលមួយសប្តាហ៍ចាប់ពីថ្ងៃទី ១១-១៧ ខែតុលា។
ទីភ្នាក់ងារសម្របសម្រួលកិច្ចការមនុស្សធម៌ (OCHA)ប្រចាំអាហ្វហ្គានីស្ថានបាននិយាយនៅក្នុងសេចក្តីប្រកាសព័ត៌មានមួយនៅលើគេហទំព័ររបស់ខ្លួនថា ប្រជាជនផ្លាស់ទីលំនៅចំនួន ២,៦២៥ នាក់នៃខេត្តBadakhshaនៃភាគឥសានប្រទេសដែលត្រឡប់មកកាន់ភូមិឋានរបស់ពួកគេវិញបានទទួលរបស់របរប្រើប្រាស់ប្រចាំថ្ងៃ។
សេចក្តីថ្លែងការណ៍បាននិយាយថា“ ប្រជាជនចំនួន ៦,០១៣ នាក់ផ្សេងទៀតនៅទូទាំងភូមិភាគឥសានបានទទួលជំនួយមនុស្សធម៌ ស្របពេលដែលប្រជាពលរដ្ឋដែលងាយរងគ្រោះសរុបចំនួន ១៦៤,៥៥៦ នាក់មកពីខេត្ត Badakhshan, Kunduz និង Takhar បានទទួលជំនួយជាស្បៀងអាហារពីកម្មវិធីស្បៀងអាហារពិភពលោក”។
នៅភាគខាងជើងប្រទេស, ប្រជាជនងាយរងគ្រោះចំនួន ៤៣,០០១ នាក់មកពីខេត្តចំនួនពីរពោលគឺមកពីខេត្ត Jawzjanនិង Sari Pul បានទទួលស្បៀងអាហារសម្រាប់រយៈពេលមួយខែក្រោមកម្មវិធីគាំទ្រនៃអង្គការស្បៀងអាហារពិភពលោក ខណៈមនុស្ស ៣,៩៧៦ នាក់មកពីទីរួមខេត្ត Balkh និងខេត្ត Faryab បានទទួលជំនួយមនុស្សធម៌។
ប្រជាជនចំនួន ១៩,១៧៨ នាក់មកពីខេត្តភាគខាងត្បូងមានដូចជាខេត្ត Kandahar, Helmand, Zabul និង Uruzgan ត្រូវបានគេជួយជារបស់របរប្រើប្រាស់ប្រចាំថ្ងៃ សម្ភារៈអនាម័យនិងតង់ជាដើម។
សេចក្តីថ្លែងការណ៍បាននិយាយថា“គ្រួសារចំនួន១,៩៤២ គ្រួសារនៃខេត្ត Helmand, Zabul និង Uruzganបានទទួលជំនួយជាសាច់ប្រាក់”។
មនុស្សប្រមាណ៥៦,០០០ នាក់នៅភាគខាងកើតបានទទួលជំនួយមនុស្សធម៌ ខណៈមនុស្ស ២,០០០ នាក់ផ្សេងទៀតមកពីតំបន់ជាមួយគ្នា នឹងត្រូវបានជួយសម្រាប់រយៈពេល១ខែ។
ចំណែកមនុស្សចំនួន ៣,១០៨ នាក់នៅទីក្រុង Kabul, ខេត្តKhostនិង Parwanដែលត្រូវបានផ្លាស់ទីលំនៅដោយសារជម្លោះកាលពីខែសីហាបានទទួលជំនួយមនុស្សធម៌ នៅពេលដែលជនអន្តោប្រវេសន៍ក្នុងស្រុកចំនួនជាង ១១ពាន់នាក់ដែលមានវត្តមាននៅទីក្រុងកាប៊ុលបានទទួលសាច់ប្រាក់និងការដឹកជញ្ជូនត្រលប់ទៅភូមិកំណើតពួកគេវិញ។
សូមជ្រាបថាក្រោយពីក្រុមតាលីបង់ចូលក្ដោបក្ដាប់អំណាចនៅពាក់កណ្តាលខែសីហា,ស្ថានភាពសន្តិសុខនៅទូទាំងប្រទេសនៅតែមានភាពស្ងប់ស្ងាត់។
បើតាមអង្គការ OCHA ជនជាតិអាហ្វហ្គានីស្ថានរាប់លាននាក់បានរងផលប៉ះពាល់យ៉ាងខ្លាំងដោយសារជម្លោះនិងការផ្លាស់ទីលំនៅរាប់ទសវត្សរ៍,ភាពក្រីក្ររ៉ាំរ៉ៃ, ជំងឺរាតត្បាតកូវីដ-១៩, គ្រោះរាំងស្ងួតធ្ងន់ធ្ងរ, ប្រព័ន្ធសុខាភិបាលទន់ខ្សោយនិង សេដ្ឋកិច្ចជាតិខិតជិតដួលរលំ៕
