ទីក្រុងមូស្គូនឹងដាក់ចេញវិធានការបិទខ្ទប់យ៉ាងតឹងរ៉ឹងបំផុតសាជាថ្មី

អភិបាលក្រុងមូស្គូលោក Sergei Sobyanin បានឱ្យដឹងកាលពីថ្ងៃព្រហស្បតិ៍ថា ទីក្រុងមូស្គូនឹងដាក់ចេញនូវវិធានការបិទខ្ទប់ដើម្បីទប់ស្កាត់ការចម្លងមេរោគកូវីដ-១៩ឡើងវិញចាប់ពីថ្ងៃទី២៨ ខែតុលាតទៅ ដោយមានតែផ្សារទំនើប និងឱសថស្ថានប៉ុណ្ណោះ ដែលអនុញ្ញាតឱ្យបើកដំណើរការ។

ការសម្រេចចិត្តនេះត្រូវបានធ្វើឡើងមួយថ្ងៃ បន្ទាប់ពីប្រធានាធិបតីរុស្ស៊ីលោក វ្ល៉ាឌីមៀ ពូទីន បានយល់ស្របឱ្យបិទកន្លែងធ្វើការនៅទូទាំងប្រទេសក្នុងរយៈពេលមួយសប្ដាហ៍ ចាប់ពីថ្ងៃទី៣០ ខែតុលា ដល់ថ្ងៃទី៧ ខែវិច្ឆិកា ហើយលោកបានបញ្ជាក់ថា អាជ្ញាធរតាមតំបន់នីមួយៗអាចដាក់ចេញវិធានការធ្ងន់ឬស្រាលទៅតាមស្ថានភាពរៀងខ្លួន។

ការបិទខ្ទប់ផ្នែកខ្លះនៅក្នុងរដ្ឋធានីនេះគឺត្រូវបានអនុវត្តឡើងវិញ បន្ទាប់ពីការបិទខ្ទប់ចុងក្រោយបង្អស់ក្នុងខែមិថុនា កាលពីឆ្នាំ២០២០កន្លងទៅ។

លោក Sobyanin បានមានប្រសាសន៍ថា ហាងទាំងអស់នឹងបិទ លើកលែងតែកន្លែងលក់ទំនិញសំខាន់ៗ ដូចជាផ្សារទំនើប និងឱសថស្ថាន។ សាលារៀន និងសាលាមត្តេយ្យក៏នឹងបិទផងដែរ ខណៈបារនិងភោជនីយដ្ឋានអាចដំណើរការបាន ប៉ុន្ដែស្ថិតក្រោមលក្ខខណ្ឌវេចខ្ចប់និងដឹកជញ្ជូនតែប៉ុណ្ណោះ។

វិធានការនេះឆ្លុះបញ្ចាំងពីភាពឆ្លើយតបជាបន្ទាន់ ចំពោះការកើនឡើងឥតឈប់ឈរនៃករណីឆ្លងមេរោគកូវីដ-១៩ក្នុងប្រទេស ហើយវិមានក្រឹមឡាំងក៏បានស្តីបន្ទោស ចំពោះអត្រាចាក់វ៉ាក់សាំងទាបផងដែរ។ ប្រទេសរុស្ស៊ី កាលពីថ្ងៃព្រហស្បតិ៍ម្សិលមិញនេះ បានរាយការណ៍ថា មានអ្នកស្លាប់ដោយសារមេរោគកូវីដ-១៩រហូតដល់ទៅ ១,០៣៦ នាក់ក្នុងរយៈពេល ២៤ ម៉ោង និងមានករណីឆ្លងថ្មីរហូតដល់ទៅ ៣៦,៣៣៩ នាក់ ដែលជាកំណត់ត្រាដ៏ខ្ពស់បំផុត៕