អន្តរជាតិ៖រដ្ឋាភិបាលក្រុងព្យូងយ៉ាងបានរិះគន់សហរដ្ឋអាមេរិកចំពោះភាពតានតឹងកាន់តែខ្លាំងឡើងៗរវាងទីក្រុងវ៉ាស៊ីនតោននិងីក្រុងប៉េកាំងជុំវិញវិបត្តិនៅកោះតៃវ៉ាន់។
ដើម្បីឆ្លើយតបទៅនឹងការដាក់សម្ពាធយោធារបស់ចិនទៅលើកោះតៃវ៉ាន់, សហរដ្ឋអាមេរិកបានធ្វើសមយុទ្ធយោធាកាលពីដើមខែតុលានេះនៅលើដែនទឹកភាគនិរតីនៃកោះអូគីណាវ៉ាជាមួយប្រទេស ៥ ផ្សេងទៀតដែលក្នុងនោះក៏មានជប៉ុននិងអង់គ្លេសផងដែរ។
លោក Pak Myong Ho អនុរដ្ឋមន្ត្រីក្រសួងការបរទេសកូរ៉េខាងជើងបាននិយាយនៅក្នុងសេចក្តីថ្លែងការណ៍មួយថាគោលបំណងនៃវត្តមានកងទ័ពអាមេរិកនៅកូរ៉េខាងត្បូងគឺដើម្បីដាក់សម្ពាធលើប្រទេសចិនខណៈពេលដែលការប្រមូលផ្តុំកម្លាំងទ្រង់ទ្រាយធំរបស់អាមេរិកនៅក្បែរកោះតៃវ៉ាន់គឺជាការប្តេជ្ញាចិត្តចំពោះប្រតិបត្តិការយោធាដែលផ្តោតលើប្រទេសកូរ៉េខាងជើងនៅពេលណាមួយ។
លោក Pak បានថ្លែងបន្តថានេះវាបង្ហាញថាអាមេរិកមានបំណងរារាំងកូរ៉េខាងជើងនិងចិនដែលជាប្រទេសប្រកាន់របបលទ្ធិសង្គមនិយម។
លោកបានការពារជំហររបស់ទីក្រុងប៉េកាំងដោយនិយាយថាបញ្ហាទាក់ទងនឹងកោះតៃវ៉ាន់គឺជាកិច្ចការផ្ទៃក្នុងរបស់ចិនទាំងស្រុង៕
