នីហ្សេរីយ៉ា៖អ្នកទោសជាង ៨០០ នាក់បានរត់គេចខ្លួនបន្ទាប់ពីខ្មាន់កាំភ្លើងបើកការវាយប្រហារទៅលើមន្ទីឃុំឃាំង នៅភាគនិរតីប្រទេសនីហ្សេរីយ៉ា

អន្តរជាតិ៖សេវាកម្មអប់រំកែប្រែរបស់ប្រទេសនេះបានបញ្ជាក់កាលពីថ្ងៃសៅរ៍ថាអ្នកទោសជាង ៨០០ នាក់បានរត់គេចខ្លួនបន្ទាប់ពីក្រុមខ្មាន់កាំភ្លើងមិនស្គាល់អត្តសញ្ញាណមួយក្រុមបើកការបាញ់ប្រហារទៅលើមជ្ឈមណ្ឌលឃុំឃាំងមួយនៅរដ្ឋ Oyoភាគនិរតីនៃប្រទេសនីហ្សេរីយ៉ា។

លោក Olanrewaju Anjorin អ្នកនាំពាក្យមណ្ឌលអប់រំកែប្រែនីហ្សេរីយ៉ា(NCoS)នៅក្នុងរដ្ឋ Oyo បាននិយាយនៅក្នុងសេចក្តីថ្លែងការណ៍មួយថា អ្នកទោសចំនួន ៨៣៧ នាក់ដែលកំពុងរង់ចាំការកាត់ទោសបានរត់គេចពីមជ្ឈមណ្ឌលសន្តិសុខកម្រិតមធ្យមនៅក្នុងតំបន់ Abolongo នៃរដ្ឋ បន្ទាប់ពីក្រុមខ្មាន់កាំភ្លើងបើកការបាញ់ប្រហារទៅលើទីតាំងកាលពីយប់ថ្ងៃសុក្រ។

លោក Anjorin បានឱ្យដឹងថា”ក្រុមខ្មាន់កាំភ្លើងបានទៅដល់មជ្ឈមណ្ឌល ប្រដាប់ដោយអាវុធទំនើបៗ បន្ទាប់មកពួកគេបានបាញ់គ្នាទៅវិញទៅមកជាមួយឆ្មាំគុក។ ពួកគេបានប្រើគ្រាប់បែកដើម្បីបំផ្ទុះជញ្ជាំងគុក”។

អ្នកនាំពាក្យខាងលើបាននិយាយថាខ្មាន់កាំភ្លើងបានដោះលែងអ្នកជាប់ឃុំចំនួន ៨៣៧នាក់ដែលកំពុងរង់ចាំការកាត់ទោស ប៉ុន្តែបន្ទប់អ្នកទោសចំនួន ៦៤ បន្ទប់ផ្សេងទៀតមិនត្រូវបានដោះលែងនោះទេ។

ទោះបីជាយ៉ាងណាក៏ដោយ, លោក Anjorinបាននិយាយថាអ្នករត់គេចខ្លួនចំនួន ២៦២ នាក់ត្រូវបានចាប់ខ្លួនវិញហើយគិតត្រឹមថ្ងៃសៅរ៍ ខណៈអ្នកទោស ៥៧៥ នាក់ផ្សេងទៀតបានគេចខ្លួន។

លោកបានបន្តថាដំណើរការនៃការស្វែងរកនិងចាប់យកមកវិញបានចាប់ផ្តើម ហើយបានជំរុញឱ្យប្រជាជនក្នុងតំបន់ផ្តល់កិច្ចសហការណ៍ដើម្បីជួយដល់ភ្នាក់ងារសន្តិសុខក្នុងការតាមចាប់ជនល្មើស។

ក្នុងរយៈពេលប៉ុន្មានខែថ្មីៗនេះ, ខ្មាន់កាំភ្លើងបានវាយប្រហារជាបន្តបន្ទាប់នៅទូទាំងប្រទេសនីហ្សេរីយ៉ា រួមទាំងការវាយប្រហារទៅលើទីតាំងសន្តិសុខដូចជាប៉ុស្តិ៍ប៉ូលិស និងមជ្ឈមណ្ឌលឃុំឃាំងជាដើម។

សូមរំលឹកថាកាលពីដើមមេសាក្រុមខ្មាន់កាំភ្លើងមួយក្រុមបានវាយប្រហារទៅលើ ទីស្នាក់ការកណ្តាលប៉ូលិសនៃរដ្ឋImo និងមណ្ឌលអប់រំកែប្រែរបស់រដ្ឋដោយបានដោះលែងអ្នកទោសជាង១,៨០០ នាក់៕